নগাঁৱৰ অন্যতম অগ্ৰণী শিক্ষানুষ্ঠান তথা কনিষ্ঠ মহাবিদ্যালয় কলংপাৰ বিদ্যাপীঠৰ ত্ৰিবিংশতি সংখ্যক নৱাগত আদৰণী সভা অনুষ্ঠিত হয়। এই উপলক্ষে বৃহস্পতিবাৰে মহাবিদ্যালয়খনৰ প্ৰেক্ষাগৃহত প্ৰাক্তন মন্ত্ৰী, অধ্যাপক গিৰীন্দ্ৰ কুমাৰ বৰুৱাৰ সভাপতিত্বত অনুষ্ঠিত হোৱা মুকলি সভাত বিদ্যাপীঠখনৰ অধ্যক্ষ অমৰজিৎ গোস্বামীয়ে নৱাগতসকলক আনুষ্ঠানিকভাৱে আদৰণী জনায়।
ভাষণ প্ৰসংগত অধ্যক্ষগৰাকীয়ে কিছু যুৱকৰ উদ্যোগত ১৯৯৬ চনত সেৱাৰ মানসেৰে কলংপাৰ বিদ্যাপীঠ প্ৰতিষ্ঠা কৰাৰ ইতিহাস সোঁৱৰণ কৰে আৰু আহি থকা দিনতো কেৱল সমাজ সেৱাৰ লক্ষ্য-উদ্দেশ্য আগত ৰাখিয়ে শিক্ষানুষ্ঠান পৰিচালিত হৈ থাকিব বুলি মন্তব্য কৰে।
মুকলি সভাখনত বিশিষ্ট অতিথি হিচাপে উপস্থিত থাকি অৱসৰপ্ৰাপ্ত অধ্যাপক, জ্যেষ্ঠ সাংবাদিক ড০ আবু হানিফাই ছাত্ৰ-ছাত্ৰীসকলক উদ্দেশ্যি কয়– ”সমাজত এতিয়া প্ৰকৃত মানুহৰ সংখ্যা দিনক দিনে কমি আহিছে। এতিয়াৰ নতুন প্ৰজন্মৰ গৰিষ্ঠসংখ্যকেই নম্বৰৰ পিছত দিন-ৰাতি একাকাৰ কৰে। অভিভাৱকৰ পৃষ্ঠপোষকতাত এতিয়া ছাত্ৰ-ছাত্ৰীসকলৰ মাজত নম্বৰৰ প্ৰতিযোগিতা আৰম্ভ হৈছে। কিন্তু মানৱীয় গুণ আহৰণত কোনেও গুৰুত্ব প্ৰদান কৰা নাই’।
শিক্ষাৰ্থী হিমাক্ষী বৰদলৈ, ৰুহুল আমিন, অংকিতা কুণ্ডু আৰু বিকাশ শৰ্মাই আদৰণী ভাষণ প্ৰদান কৰা সভাত ২০১৮ বৰ্ষৰ উচ্চতৰ মাধ্যমিক চূড়ান্ত পৰীক্ষাৰ কলা আৰু বাণিজ্য শাখাত শীৰ্ষস্থান লাভ কৰা সম্প্ৰীতি ৰাজখোৱা আৰু ৰৌণক লোহিয়াক ২০১৮ বৰ্ষৰ শিক্ষাবিদ হেমকান্ত শৰ্মা সোঁৱৰণী বঁটা প্ৰদান কৰা হয়। বঁটা প্ৰদান কৰে বিশিষ্ট শিক্ষাবিদ, বিদ্যাপীঠখনৰ ৰেক্তৰ ৰত্নকান্ত দেৱনাথে।
উক্ত সভাতে অসম সাহিত্য সভাৰ প্ৰধান সম্পাদক তথা শিক্ষানুষ্ঠানখনৰ এগৰাকী অন্যতম প্ৰতিষ্ঠাপক পদুম ৰাজখোৱাক উষ্ম সম্ভাষণ জনোৱা হয়। সভাৰ আৰম্ভণিতে শিক্ষাবিদ হৰেশ্বৰ গোস্বামী আৰু হেমকান্ত শৰ্মাৰ প্ৰতিচ্ছবিৰ সন্মুখত বন্তি প্ৰজ্বলন আৰু পুষ্প তৰ্পণ কৰা হয়।
