দেশৰ শাস্ত্ৰীয় সংগীতৰ ঐতিহ্যৰ দিশত যোগোৱা বৰঙণিৰ বাবে বিশিষ্ট সত্ৰীয়া নৃত্যশিল্পী প্ৰীতিলেখা চৌধুৰীলৈ আগবঢ়োৱা হৈছে সন্মানীয় কলাতীৰ্থ বঁটা। এই বঁটা গুজৰাটৰ মানৱ কল্যাণ মণ্ডল নামৰ সংস্থাটোৱে আগবঢ়াইছে।
বিগত দুটা দশকৰো অধিক কাল সত্ৰীয়া নৃত্য প্ৰদৰ্শন কৰি অহা চৌধুৰীয়ে প্ৰসিদ্ধ সত্ৰীয়া নৃত্যৰ গুৰু গৰিমা হাজৰিকা, বিশিষ্ট শংকৰদেৱ বিষয়ক পণ্ডিত প্ৰয়াত কেশৱানন্দ দেৱ গোস্বামীকে ধৰি বিশিষ্ট গুৰুসকলৰ পৰা সত্ৰীয়া নৃত্যৰ বুনিয়াদী পাঠ গ্ৰহণ কৰিছিল।
প্ৰীতিলেখা চৌধুৰীয়ে দেশৰ বিভিন্ন প্ৰান্তত অনুষ্ঠিত বহু নৃত্য মহোৎসৱত সত্ৰীয়া নৃত্য প্ৰদৰ্শন কৰি আহিছে। সত্ৰীয়া নৃত্যৰ অভিনয় ভাগৰ বিষয়ত গৱেষণাৰ বাবে তেওঁ কেন্দ্ৰীয় সাংস্কৃতিক মন্ত্ৰ্যালয়ৰ পৰা জুনিয়ৰ ফেল’শ্বিপো লাভ কৰিছিল।
চৌধুৰীয়ে প্ৰায় এটা দশক পূৰ্বে দূৰদৰ্শনৰ ‘এ গ্ৰেড’ শিল্পীৰ স্বীকৃতি লাভ কৰিছিল। চৌধুৰীয়ে বৰ্তমান দিল্লী, মহাৰাষ্ট্ৰকে ধৰি দেশৰ আন অংশত সত্ৰীয়া নৃত্য তথা সংগীতৰ প্ৰসাৰৰ বাবে নিয়োজিত হৈ আছে।
ইয়াৰ পূৰ্বে প্ৰীতিলেখা চৌধুৰীয়ে মহাৰাষ্ট্ৰৰ নান্দেত সপ্তৰঙ সাংস্কৃতিক মহোৎসৱত আন এক সন্মানীয় ‘কলাভূষণ’ বঁটাৰে সন্মানিত হৈছিল।
