ক’ৰ’না মহামাৰীৰ বাবে দীৰ্ঘদিন ধৰি বন্ধ হৈ থকা ঐতিহাসিক কামাখ্যা মন্দিৰৰ দুৱাৰ দৰ্শনাৰ্থীৰ বাবে অহা ২৪ ছেপ্তেম্বৰৰ পৰা পুনৰ খুলি দিয়া হ’ব বুলি কামৰূপ মহানগৰ জিলা প্ৰশাসনে আজি জনায়।
মহানগৰ জিলা প্ৰশাসনে জাৰি কৰা নিৰ্দেশনা অনুসৰি মন্দিৰত প্ৰতিদিনে কেৱল ৫০০ জন ভক্তৰ প্ৰৱেশৰ বাবে অনুমতি প্ৰদান কৰিছে।
নিৰ্দেশনাটোত লগতে কোৱা হয় যে কামাখ্যা মন্দিৰ কৰ্তৃপক্ষই ভক্তসকলৰ আবেদনৰ ভিত্তিত অনলাইন পাছৰ ব্যৱস্থা কৰিব।
ইয়াৰ উপৰি ৬৫ বছৰৰ ওপৰৰ ব্যক্তি আৰু ১০ বছৰৰ তলৰ শিশুক মন্দিৰত প্ৰৱেশ কৰিব দিয়া নহয়। অনলাইন পাছ ইচ্ছ্যু কৰাৰ সময়ত এই সমূহ বিষয়ত মন্দিৰ কৰ্তৃপক্ষই গুৰুত্ব প্ৰদান কৰিব লাগিব।
অনলাইন পাছ ইচ্ছ্যু কৰাৰ সময়ত যাতে ভিৰ নহয় তাৰ বাবে নিৰ্দিষ্ট সময় বান্ধি দিয়া হ’ব বুলিও জানিবলৈ দিয়ে।
ইফালে মন্দিৰৰ চৌহদ তথা আশে পাশে থকা ঘৰসমূহত কোনো ভক্তকে থাকিবলৈ অনুমতি প্ৰদান নকৰাৰ কথাও নিৰ্দেশনাটোত উল্লেখ কৰে।
