সুৰা মুক্ত হোলী : ২১ মাৰ্চত বন্ধ থাকিব মহানগৰীৰ সুৰা বিপণি

কাইলৈ সমগ্ৰ ৰাজ্যতে উলহ-মালহেৰে ৰঙৰ উৎসৱ ফাকুৱা পালন কৰিব ৰাজ্য বাসীয়ে। ইতিমধ্যে গুৱাহাটী মহানগৰীৰো দোকান-পোহাৰ বিভিন্ন ৰঙৰ ফাকু গুৰিৰে ভৰি পৰিছে ফল্গু উৎসৱক আদৰাৰ প্ৰস্তুতিৰে।

ফাকুৱা উপলক্ষে কামৰূপ মহানগৰ জিলা প্ৰশাসনে আইন-শৃখংলা দিশৰ প্ৰতি সষ্টম হৈ পৰা পৰিলক্ষিত হৈছে। উৎসৱৰ বতৰত যাতে কোনোধৰণৰ অপ্ৰীতিকৰ ঘটনা সংঘটিত নহয় তাৰবাবে মহানগৰ প্ৰশাসনে ২১ মাৰ্চত বিয়লি ৪ বজা পৰ্য্যন্ত সকলো সুৰাৰ বিপনী বন্ধ ৰখাৰ কঠোৰ নিৰ্দেশ দিছে।

কামৰূপ মহানগৰ জিলা উপায়ুক্ত বিশ্বজিৎ পেগুৱে বুধবাৰে সংবাদমাধ্যমৰ আগত এই নিৰ্দেশনা জাৰি কৰাৰ কথা প্ৰকাশ কৰে। সুৰা সেৱন কৰি কোনো লোকে যাতে উদণ্ড আচৰণ কৰি আইন-শৃংখলা নষ্ট নকৰে তাৰ বাবে এই সিদ্ধান্ত গ্ৰহণ কৰা বুলি মন্তব্য কৰে উপায়ুক্ত গৰাকীয়ে।

উল্লেখযোগ্য যে, ২১ মাৰ্চত ফাকুৱা আৰু দৌল যাত্ৰা উপলক্ষে সকলো চৰকাৰী কাৰ্য্যালয়, বিদ্যালয়, মহাবিদ্যালয় বন্ধ থাকিব। ২২ মাৰ্চত কামৰূপ মহানগৰ জিলা প্ৰশাসনে স্থানীয় বন্ধ ঘোষণা কৰিছে। অৱশ্যে চৰকাৰে ২২ আৰু ২৩ মাৰ্চত ৰাজ্যৰ কোষাগাৰ সমূহ মাৰ্চ এণ্ডিঙৰ প্ৰতি লক্ষ্য ৰাখি খোলা ৰখাৰ নিৰ্দেশ দিছে।