শীতৰ বতৰা লৈ নমা নেৰানেপেৰা বৰষুণৰ মাজত কামৰূপ মহানগৰ জিলা পৰিবহণ বিভাগে শুকুৰবাৰে গুৱাহাটীৰ ৰাজপথত চলোৱা অভিযানত জৰিমনাৰ অতৰ্কিত উত্তাপৰ সন্মুখীন হয় নিয়ম ভংগকাৰী যান-চালক।
সমগ্ৰ দেশজুৰি বলবৎ হোৱা মটৰ বাহন আইন, ২০১৯ সন্দৰ্ভত এতিয়াও সজাগ হোৱা নাই গুৱাহাটী মহানগৰৰ কিছুসংখ্যক লোক।
অভিযানটোত বিভাগে হেলমেট পৰিধান নকৰা, ছীট বেল্ট পৰিধান নকৰা তথা উপযুক্ত নথি-পত্ৰ লগত নৰখা বহু লোকক জৰিমনা ভৰোৱায়।
গুৱাহাটীৰ জয়ানগৰ চাৰিআলিত জিলা পৰিবহণ বিষয়া বাপন কলিতাৰ নেতৃত্বত পুৱাৰ ভাগত চলোৱা অভিযানত জব্দ হ’ল বহুকেইখন বাহনৰ নথি-পত্ৰ আৰু বহুকেইখন বাহনৰ গৰাকীৰ বিৰুদ্ধে ৰুজু হ’ল গোচৰ।
ইপিনে, বহুকেইগৰাকী স্কুলীয়া ছাত্ৰ-ছাত্ৰীৰ অভিভাৱকে বিনা হেলমেটেৰে বাইক চলাই আহিছিল। পৰিবহন বিভাগে চলোৱা অভিযানত তেওঁলোকো সাৰি নগ’ল।
মহানগৰ জিলা পৰিবহন বিভাগে চলোৱা অভিযানকালত মুঠ ১২ খন বাহনৰ নথি-পত্ৰ জব্দ কৰে বুলি নৰ্থ ইষ্ট নাওৰ সাংবাদিকক জিলা পৰিবহণ বিষয়া বাপন কলিতাই জানিবলৈ দিয়ে। সেই বাহনকেইখনৰ গৰাকীৰ বিৰুদ্ধে গোচৰো ৰুজু কৰিছে পৰিবহণ বিভাগে।
উক্ত অভিযান কালত প্ৰায় ৬০০০ টকাৰ জৰিমনা বিহে জিলা পৰিবহণ বিভাগে।
আনহাতে, অনাগত দিনসমূহতো অতৰ্কিতে মহানগৰীৰ ভিন্ন প্ৰান্তত জিলা পৰিবহণ বিভাগে অভিযান চলাব বুলি জানিবলৈ দি কলিতাই সকলো আৰোহীকে সজাগতা অৱলম্বন কৰি যান-বাহন আইন মানি চলিবলৈ আহ্বান জনায়।
