সঁচাকৈয়ে, জিহাদীৰ দেশ হৈ পৰিল ভাৰতবৰ্ষ। কেন্দ্ৰীয় চৰকাৰে কৃষি আইন তিনিখন বাতিল কৰিবলৈ বাধ্য হোৱাৰ পাছতে দেশখন জিহাদীৰে ভৰি পৰা যেন লাগিছে। চাৰিওফালে যেন জিহাদী ঘূৰি ফুৰিছে! এই কথা আমি কোৱা নাই। শেহতীয়াকৈ সমাজতত্ব, ইতিহাসকে ধৰি সকলো বিষয়তে হঠা চৰম পাণ্ডিত্যৰ পৰিচয় দি চমক দিয়া বলিউডৰ অভিনেত্ৰী পদ্মশ্ৰী কংগনা ৰানাৱটেও এইধৰণে অনুভৱ ব্যক্ত কৰিছে।
ইনষ্টাগ্ৰামত কংগনাই কৈছে যে যদি চৰকাৰৰ সলনি ৰাজপথৰ আন্দোলনকাৰীৰ কথামতে দেশৰ আইন-কানুন বনোৱা আৰম্ভ হয়, তেনেহ’লে দেখোন দেশখন জিহাদীস্তান হৈ পৰিব!
বৰ দুখৰ কথা! জিহাদীৰ উৎপাতত যে প্ৰধানমন্ত্ৰীয়ে কৃষি আইনৰ দৰে দেশপ্ৰেমী আইন ৰূপায়ন কৰিব নোৱাৰিলে, এইটো বিজেপি-আৰএছএছৰ নীতিৰ অত্যন্ত শোচনীয় অৱস্থা। অতি দুৰ্ভাগ্যজনক। বিজেপি-আৰএছএছৰ দৰে ইমান দেশপ্ৰেমী দল এটাই জিহাদীৰ ওচৰত শিৰ নত কৰাটোৱে ভৱিষ্যতৰ বাবে অশনি শংকেত কঢ়িয়াই আনিছে। জিহাদীৰ উৎপাত ইমানেই বাঢ়িছে যে সমাগত উত্তৰ প্ৰদেশ নিৰ্বাচনৰ বাবে বিজেপিৰ অৱস্থা কাঢ়িল হৈ পৰা যেন লাগিছে।
যিসময়ত হিন্দু মুছলমানক লৈ ৰাজনীতি কৰাটো প্ৰয়োজন, মুছলমানৰ বিৰুদ্ধে হিন্দু জাগ্ৰত হোৱাৰ সময়, সেই সময়ত আক’ উত্তৰ প্ৰদেশৰ ভোটাৰে কৃষি আইন তিনিখনক লৈ ৰাজনীতি কৰিবলৈ উলাইছে। চৰম দুৰ্ভাগ্যজনক! উত্তৰপ্ৰদেশত যাতে যোগী আদিত্যনাথ পুনৰ জিকিব পাৰে, সেই কথা লক্ষ্য ৰাখিয়েই কেন্দ্ৰীয় মন্ত্ৰীৰ পুত্ৰই লখিমপুৰৰ খেৰীত গাড়ীৰে কৃষকক মহতীয়াই নিছিল। অ’হ ক্ষমা কৰিব, কৃষক নহয়, তেওঁলোক জিহাদীহে!
প্ৰকৃত কৃষকে কেতিয়াও ৰাজপথত আন্দোলন নকৰে। প্ৰকৃত কৃষকে পথাৰত খেতিখোলা কৰি থকাটোৱেই স্বভাৱ। প্ৰকৃত কৃষকৰ কাম হৈছে কপালৰ ঘাম মাটিত পেলাই দেশক অন্ন যোগান ধৰা। ই এটা মহৎ কাম। ত্যাগো বুলিব পাৰি। গীতাত কৈছে যে কৰ্ম কৰি যোৱা, ফলাফলৰ কথা নাভাবিবা। সেয়ে প্ৰকৃত কৃষকে কেতিয়াও ফচলৰ দাম, শস্যৰ মূল্য তথা এমএছপিৰ কথা নাভাবে। চৰকাৰী নীতিৰ প্ৰতি আনুগত্য হৈ চকু কাণ মুদি থকাটোৱেই কৃষকৰ দায়িত্ব।
কিন্তু কৃষকসকলৰ নাম লৈ যে এই পাকিস্তানপ্ৰেমী, নক্সাল, খালিস্তানী জিহাদীসকলে ইমানদিনে ৰাজপথ উত্তাল কৰি ৰাখিলে, আনকি পঞ্জাৱ, হাৰিয়ানা, উত্তৰপ্ৰদেশৰ দৰে ৰাজ্যত বিজেপিৰ দৰে দেশহিতৈষী, দেশপ্ৰেমী দল এটাইও প্ৰত্যাহ্বানৰ সমুখিন হ’ব লগা পৰিস্থিতিৰ উদ্ভৱ হৈছে। এইবোৰ কথাত ক্ষোভিত হৈয়েই কেন্দ্ৰীয় মন্ত্ৰীৰ পুত্ৰই লখিমপুৰ কাণ্ড সংঘটিত কৰিছিল। উচিত কাম কৰিছিল! অন্ততঃ দুজনমান জিহাদীৰ মৃত্যু হ’ল।
এনেধৰণে আৰু কেইটামান ঘটনা সংঘটিত হোৱা হ’লে অনেক জিহাদীৰ মৃত্যু হ’লহেঁতেন। কৃষি আইনৰ প্ৰতিবাদৰ নামত যে ছশৰো অধিক কৃষকৰ মৃত্যু হ’ল, অ’হ ক্ষমা কৰিব কৃষক নহয়! তেওঁলোক জিহাদীহে। কৃষি আইনৰ প্ৰতিবাদৰ নামত যে জিহাদীসকলৰ মৃত্যু হ’ল, সেয়াও দেশৰ হিতৰ বাবেই।
মনত ৰাখিব দৰ্শকসকল, দেশত এতিয়াও কিন্তু জিহাদী শেষ হোৱা নাই! জিহাদীসকলৰ কোনো কথা নুশুনিব। পাৰিলে এনডি টিভি, দ্যা প্ৰিণ্ট এই নিউজ চেনেল আৰু চাইসমূহ নাচাব। তাত জিহাদীসকলৰ প্ৰচাৰ কৰা হয়। গোদী মিডিয়া চাওক। গোদী মিডিয়াৰ ৰুবিকা, অৰ্ণৱ, সুধীৰহঁতৰ মুখকেইখন চালেই ভাল লাগি যায়।
দেশক জিহাদীমুক্ত কৰিবলৈ কিমান ত্যাগ কৰি আছে তেওঁলোকে। আচলতে গোদী মিডিয়াৰ প্ৰপাগাণ্ডা দেশবাসীয়ে ভালদৰে হৃদয়ংগম নকৰাৰ বাবেই কৃষি আইন বাতিল কৰিব লগা হ’লনেকি? তেনেহ’লে অতি দুৰ্ভাগ্যৰ কথা। কৃষি আইনৰ সুফলৰ প্ৰচাৰ আৰু জিহাদী-খালিস্তানীসকলৰ বিৰুদ্ধে গোদী মিডিয়াৰ শ্ৰম অথলে যোৱাটো বৰ দুৰ্ভাগ্যৰ কথা!
আৰু এটা কথা। কংগনাৰ মতে, যিহেতু ভাৰতবৰ্ষ ২০১৪ চনত স্বাধীন হৈছে। সেই অনুসৰি দেশে নিজৰ নীতি নিজেই তৈয়াৰ কৰিব পাৰিব লাগিব। কৃষি আইন তিনিখন স্বাধীন ভাৰতে লোৱা নীতি। ২০১৪ চনত স্বাধিনতা লাভ কৰিয়ে ভাৰতে ৩৭০ ধাৰা বাতিল, কা আইন প্ৰণয়ন আৰু কৃষি আইনৰ দৰে মহৎ পদক্ষেপ হাতত লৈছিল। কিন্তু জিহাদীবিলাকে নিদিয়ে। ইয়াত হাত উজান দিছে বিদেশী শক্তিবিলাকে। অ’হ ক্ষমা কৰিব, বিদেশী শক্তি নহয়, বিদেশী অপশক্তি।
কৃষি আইনক লৈ বিদেশী অপশক্তিসমূহে যি জিহাদী নেটৱৰ্ক গঢ়ি তুলিলে, সেয়া ২০১৪ চনত স্বাধীনতা লাভ কৰা দেশখনৰ বাবে অতি অপমানজনক। ই দেশৰ সাৰ্বভৌমত্ব, অখণ্ডতা ৰক্ষাৰ প্ৰতি তীব্ৰ ভাবুকি। ভাৰতৰ চৰকাৰে নীতি প্ৰস্তুত কৰিছে, তাত আমেৰিকাৰ ৰিহান্নাৰ দৰে সস্তীয় পপ তাৰকা, ছুইডেনৰ গ্ৰেটা ঠাণবাৰ্গৰ দৰে পাবত গজা পৰিৱেশ সুৰক্ষা কৰ্মীয়ে মাত মাতিবলৈ কি দৰকাৰ?
আনকি আমেৰিকা যুক্তৰাষ্ট্ৰৰ উপৰাষ্ট্ৰপতি কমলা হেৰিছেও কৃষি আইনৰ বিৰোধিতা কৰে। ই পশ্চিমীয়া দেশসমূহে ভাৰতৰ প্ৰতি সাম্ৰাজ্যবাদী প্ৰভাৱ বিস্তাৰ কৰাটো নুবুজায়নে? ২০১৪ চনত স্বাধীনতা লাভ কৰা আমাৰ দেশখনৰ প্ৰতি ই চৰম ভাবুকি নহয়নে? এবাৰ ভাবি চাওক!
আকৌ ভাবক, প্ৰধানমন্ত্ৰীয়ে কৈছেই যে কৃষি আইন বাতিল কৰা হ’ব। তেনে পৰিস্থিতিত আন্দোলনৰত কৃষকসকল, অ’হ ক্ষমা কৰিব, আন্দোলনৰত জিহাদীসকলে কি কৰিব লাগিছিল? ঘৰলৈ ঘূৰি যাব লাগিছিল। যদি প্ৰকৃত কৃষক হয়, তেন্তে মোদীক বাহ বাহ দিব লাগিছিল।
কিন্তু তাকে নকৰি কি কৰিছে? এতিয়াও প্ৰতিবাদস্থলী এৰা নাই। তেওঁলোকে কৈছে যে মোদীয়ে ক’লেই নহ’ব, সংসদত কৃষি আইন বাতিল কৰিব লাগিব। আৰে! মোদীৰ মুখৰ কথা বিশ্বাস নকৰে নেকি তেওঁলোকে? মোদীৰ মুখৰ কথা শিলৰ ৰেখা। যোৱা সাত বছৰ ধৰি জনগণে তাকেই লক্ষা কৰি আহিছে যে মোদীৰ কথা শিলৰ ৰেখা। মোদীৰ কথাত আশ্বস্ত নোহোৱাজন প্ৰকৃততে একো একোজন জিহাদী! মুঠৰ ওপৰত, জিহাদীৰ জয় হৈছে নেকি দেশখনত? ভাবি চাওক, অনুধাৱন কৰক!
