অসমীয়া মেখেলা-চাদৰ পৰিধান কৰি ৰেম্পত মোহময়ী কৰিশ্মা কাপুৰ
ৰাজধানী দিল্লীত চলি থকা ল’টাছ মেক আপ ইণ্ডিয়া ফেশ্বন উইক-২০১৯ ত বৃহস্পতিবাৰে অসমীয়া চাদৰ মেখেলাৰে ৰেম্পত দেখা গ’ল বলীউদৰ মোহময়ী অভিনেত্ৰী কৰিশ্মা কাপুৰক।
উল্লেখযোগ্য যে, অসমৰ জনপ্ৰিয় ফেশ্বন ডিজাইনাৰ সংযুক্তা দত্তৰ শেহতীয়া ডিজাইন ‘মৰম’ ৰ অসমীয়া চাদৰ-মেখেলা পিন্ধি কৰিশ্মা কাপুৰক যথেষ্ট উৎফুল্লিত ৰূপত দেখা গ’ল। ৰেম্পত অসমীয়া সংস্কৃতিক প্ৰতিনিধিত্ব কৰি সাংবাদিকৰ আগত কৰিশ্মাই মেখেলা চাদৰৰ উচ্চ প্ৰসংশা কৰে।
আন্তঃৰাষ্ট্ৰীয় পৰ্য্যায়ত অসমৰ ডিজাইনাৰ সংযুক্তা দত্তই দীৰ্ঘদিনৰ পৰা কাম কৰি আহিছে। কৰিশ্মাৰ পূৰ্বেও বহু কেইগৰাকী বলীউদৰ অভিনেতা-অভিনেত্ৰীয়ে দত্তই ডিজাইন কৰা কাপোৰ পৰিধান কৰিছে।
চলিত ল’টাছ মেক আপ ইণ্ডিয়া ফেশ্বন উইকত সংযুক্তাই ডিজাইন কৰা মৰম নামৰ কালেকচনটো ফুল আৰু পখিলাৰ অনুকৰণত প্ৰস্তুত কৰা। ক’লাত ৰঙা আৰু সোণালী ৰঙেৰে ডিজাইন কৰা হয় মৰম নামৰ কালেকচনটো।
অসমৰ ডিজাইনাৰ সংযুক্তা দত্তই বহু দিনৰ পৰা অসমৰ সৃষ্টিৰাজি আৰু সৌন্দৰ্য্য পোছাকৰ মাধ্যমেৰে ভাৰতবৰ্ষৰ মঞ্চত প্ৰতিষ্ঠা কৰাৰ প্ৰয়াস চলাই আহিছে।