কৰ্ণাটকৰ মুখ্যমন্ত্ৰী সিদ্দাৰমাইয়াৰ ঘোষণা অনুসৰি ২২ ছেপ্টেম্বৰত চামুণ্ডি পাহাৰ মন্দিৰত অনুষ্ঠিত হ’বলগীয়া মহীচুৰ দশেৰা মহোৎসৱ উদ্বোধন কৰিব আন্তঃৰাষ্ট্ৰীয় বুকাৰ বঁটা বিজয়ী কানাড়া সাহিত্যিকা বানু মুস্তাকে। চুটিগল্প সংকলন হাৰ্ট লেম্পৰ বাবে সন্মানিত ৭৭ বছৰীয়া এই লেখিকাগৰাকীক লৈ এতিয়া ৰাজ্যখনৰ ৰাজনৈতিক পৰিৱেশ উত্তপ্ত হৈ পৰিছে।
বিজেপি আৰু হিন্দুত্ববাদী সংগঠনে বানু মুস্তাকৰ অংশগ্ৰহণক লৈ তীব্ৰ আপত্তি জনাইছে। তেওঁলোকৰ অভিযোগ, হিন্দু ধৰ্মীয় উৎসৱৰ উদ্বোধনকাৰী হিচাপে তেওঁৰ অংশগ্ৰহণ অনুচিত। তেওঁলোক উদ্ধৃতি দিছে এটা পুৰণি ভিডিঅ’ৰ য’ত মুস্তাকে কানাড়া ভাষাক দেৱী ভুৱনেশ্বৰী হিচাপে পূজা কৰাক লৈ প্ৰশ্ন তুলিছিল। ইয়াৰ ফলত দেৱী চামুণ্ডেশ্বৰীৰ প্ৰতি তেওঁৰ বিশ্বাস সন্দেহজনক বুলি বিজেপিৰ অভিমত।
কেন্দ্ৰীয় মন্ত্ৰী শোভা কৰণ্ডলাজে আৰু সাংসদ তেজস্বী সূৰ্যই কংগ্ৰেছ চৰকাৰৰ ওপৰত আক্রমণ কৰি কয়, বানু মুস্তাকক নিন্ত্ৰণ কৰাটো কেৱল তুষ্টিকৰণৰ ৰাজনীতি আৰু হিন্দু আৱেগক আঘাত দিয়া। প্ৰাক্তন সাংসদ প্ৰতাপ সিংহাই মন্তব্য কৰে, “লেখিকা হিচাপে তেওঁ সন্মানিত হ’লেও, দশেৰা যিহেতু ধৰ্মীয় আচৰ-অনুষ্ঠানৰ সৈতে জড়িত, সেয়ে এই অনুষ্ঠান উদ্বোধন বাবে তেওঁ উপযুক্ত নহয়।”
ইপিনে, ৰাজ্য চৰকাৰে গৃহমন্ত্ৰী জি পৰমেশ্বৰে স্পষ্টভাবে কৈছে যে দশেৰা ৰাজ্যিক উৎসৱ হিচাপে সকলো সম্প্ৰদায়ে মিলি উদযাপন কৰা উৎসৱ। ২০১৭ চনত কবি কে এছ নিছাৰ আহমেদেও মহোৎসৱ উদ্বোধন কৰিছিল বুলি উদাহৰণ দি পৰমেশ্বৰে বিজেপিৰ অভিযোগক অপ্ৰয়োজনীয় ৰাজনীতিকৰণ বুলি অভিহিত কৰে।
বানু মুস্তাকে নিজেও এক বিবৃতিত দেৱী চামুণ্ডেশ্বৰীৰ প্ৰতি শ্ৰদ্ধা প্ৰকাশ কৰি কয়, শৈশৱতে পিতৃ-মাতৃৰ সৈতে তেওঁ দশেৰাত অংশগ্ৰহণ কৰিছিল। তেওঁ গৌৰৱৰ সৈতে কয়, “এজন কানাড়িগা হিচাপে এই উৎসৱত অংশ লোৱাৰ সুযোগ মোৰ বাবে গৰ্বৰ বিষয়। এইটো মাত্ৰ সাহিত্যিক সন্মান নহয়, ৰাজ্যৰ সাংস্কৃতিক পৰম্পৰাৰ প্ৰতিনিধিত্ব।” মহীশূৰ-কোডাগুৰ সাংসদ যদুবীৰ ৱাডিয়াৰে ৰাজপৰিয়ালৰ পৰিয়ালৰ পৰা সমৰ্থন জনাই কয়, যদি মুস্তাকে পৰম্পৰাক সন্মান কৰে, তেন্তে তেওঁ অনুষ্ঠানৰ বাবে আদৰণীয়।
