অহা ৫ৰ পৰা ৭ জানুৱাৰীলৈকে কাজিৰঙা ৰাষ্ট্ৰীয় উদ্যানত বোকাখাত মহকুমা প্ৰশাসনৰ বিশেষ উদ্যোগত তিনিদিনীয়াকৈ অনুষ্ঠিত হ’ব কাজিৰঙা উৎসৱ ২০২০ ৷
এই উপলক্ষে যোৱা নিশা কহঁৰাৰ আয়ৰা নামৰ বিলাসী হোটেলখনত আয়োজিত এক অনুষ্ঠানত প্ৰথম কাজিৰঙা উৎসৱৰ প্ৰতীক উন্মোচন কৰে কেবিনেট মন্ত্ৰী, বোকাখাতৰ বিধায়ক অতুল বৰাই।
অনুষ্ঠানত কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰ, বোকাখাতৰ মহকুমাধিপতি তথা কাজিৰঙা মহোৎসৱৰ সম্পাদক বিবেক শ্যাম, ৰাজহ চক্র বিষয়া খনীন দাস, স্থানীয় জনসাধাৰণ আৰু সংবাদ মাধ্যমৰ প্ৰতিনিধি উপস্থিত থাকে ৷
বোকাখাত মহকুমা প্রশাসন, অসম চৰকাৰৰ বনবিভাগ, পর্যটন বিভাগ আৰু কৃষি বিভাগৰ যৌথ সহযোগত অনুষ্ঠিত কৰা হ’ব।
শনিবাৰে প্ৰতীক উন্মোচন কৰি মন্ত্ৰী বৰাই এই উৎসৱৰ জৰিয়তে দেশী-বিদেশী পর্যটকক আকর্ষিত কৰাৰ বাবে প্রচেষ্টা চলোৱাৰ উপৰি ৰাজ্যত বৃদ্ধি পোৱা হাতী-মানুহৰ সংঘাতৰ ওপৰত আলোচনা চক্র অনুষ্ঠিত কৰা হ’ব বুলি জনায়।
মহকুমাধিপতি বিবেক শ্যামে কাজিৰঙা উৎসৱত বন, প্ৰকৃতি আৰু পৰিৱেশ সংৰক্ষণৰ ওপৰত বিভিন্ন আলোচনা চক্ৰৰ উপৰিও কহঁৰা আৰু অগৰাতলি বনাঞ্চলৰ বিভিন্ন স্থানত চিত্র প্রদর্শনী , খাদ্য উৎসৱ, সংস্কৃতিক কার্যসূচী অনুষ্ঠিত হ’ব বুলি জানিবলৈ দিয়ে।
উক্ত উৎসৱক সফলভাৱে অনুষ্ঠিত কৰাৰ বাবে গোলাঘাটৰ উপায়ুক্ত ধীৰেণ হাজৰিকাক সভাপতি আৰু বোকাখাতৰ মহকুমাধিপতিক সম্পাদক হিচাপে লৈ এখন সমিতি গঠন কৰা হৈছে।
