কানহাইয়া কুমাৰৰ বিৰুদ্ধে আৰম্ভ হ’ব আইনী যুঁজ; কেজৰিৱাল চৰকাৰে জনালে অনুমোদন
জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা তথা বৰ্তমানৰ চিপিআই নেতা কানহাইয়া কুমাৰৰ বিৰুদ্ধে ন্যায়ালয়ত আইনী যুঁজ আৰম্ভ কৰাৰ বাবে সেউজ সংকেত প্ৰদান কৰিছে দিল্লীৰ অৰবিন্দ কেজৰিৱাল নেতৃত্বাধীন চৰকাৰে।
২০১৬ চনত কানহাইয়াৰ বিৰুদ্ধে বিশ্ববিদ্যালয়খনত পঢ়ি থকাৰ সময়ত দেশবিৰোধী শ্লোগান দিয়াৰ অভিযোগ উত্থাপন হোৱাৰ পাছত দিল্লী আৰক্ষীয়ে তিনিবছৰ পাছত তেওঁৰ বিৰুদ্ধে ছাৰ্জশ্বীট দাখিল কৰিছিল।
উল্লেখযোগ্য যে, দিল্লী আৰক্ষীয়ে ২০১৬ চনৰ পৰা দেশদ্ৰোহীতাৰ গোচৰত কানহাইয়া কুমাৰ আৰু তেওঁৰ সংগীবৃন্দৰ বিৰুদ্ধে ন্যায়িক প্ৰক্ৰিয়া আৰম্ভ কৰাৰ বাবে দিল্লী চৰকাৰৰ পৰা অনুমোদন লাভ কৰা নাছিল যদিও অৱশেষত কেজৰিৱাল নেতৃত্বাধীন দিল্লী চৰকাৰে শীঘ্ৰে ন্যায়িক প্ৰক্ৰিয়া আৰম্ভ কৰাৰ বাবে নিৰ্দেশ দিয়ে।
আনহাতে, দিল্লী চৰকাৰে ন্যায়িক প্ৰক্ৰিয়া আৰম্ভ কৰাৰ বাবে নিৰ্দেশ দিয়াৰ পাছতে টুইটাৰযোগে নিজৰ মত প্ৰকাশ কৰিছে কানহাইয়া কুমাৰে।
‘‘দিল্লী চৰকাৰে দেশদ্ৰোহীতাৰ গোচৰৰ অনুমতি দিয়া বাবে ধন্যবাদ। দিল্লী আৰক্ষী আৰু চৰকাৰী অধিবক্তা সকলক এই গোচৰটো গুৰুত্ব সহকাৰে লোৱাৰ বাবে অনুৰোধ জনাইছো। ফাষ্ট ট্ৰেক আদালতত এই গোচৰৰ শুনানি গ্ৰহণ কৰা হওক আৰু আপকী আদালতৰ ঠাইত ন্যায়ালয়ত এই বিচাৰ প্ৰক্ৰিয়া আগবাঢ়ক। সত্যমেব জয়তে,’’ কানহাইয়া কুমাৰে টুইট কৰে।
কানহাইয়া কুমাৰৰ উপৰিও এই গোচৰত উমৰ খালিদ, আকিব হুছেইন, মুজীব, উমৰ গুল আদিকে ধৰি বহু কেইগৰাকী ছাত্ৰক অভিযুক্ত কৰা হৈছিল।