অৰুণাচল প্ৰদেশৰ ৰাজ্যপাল বি ডি মিশ্ৰই নামনি সোৱণশিৰি জলবিদ্যুৎ প্ৰকল্পৰ কাম শীঘ্ৰে আৰম্ভ হ’ব বুলি কৰা মন্তব্যৰ বিৰুদ্ধে জাঙুৰ খাই উঠিছে অসমৰ বিভিন্ন দল-সংগঠন। শুকুৰবাৰে ৰাজ্যপালগৰাকীৰ মন্তব্যৰ বিৰুদ্ধে তীব্ৰ প্ৰতিবাদ সাব্যস্ত কৰে লখিমপুৰ জিলা খেৰাজখাট সীমান্ত আঞ্চলিক ছাত্ৰ-সন্থাই।
ছাত্ৰ সংগঠনটোৱে দিনৰ ১২ বজাত পাথালিপাহাৰত ১৫ নং ৰাষ্ট্ৰীয় ঘাইপথ অৱৰোধ কৰি ৰাজ্যপালগৰাকীৰ জুমুঠি দাহ কৰি প্ৰতিবাদ সাব্যস্ত কৰে। আছুৰ প্ৰতিবাদৰ ফলত ৰাষ্ট্ৰীয় ঘাইপথটোত এঘণ্টাতকৈও অধিক সময়ৰ বাবে যান-বাহনৰ চলাচল ব্যাহত হৈ পৰে।
আনহাতে, নামনি সোৱণশিৰি প্ৰকল্পৰ কাম কোনো কাৰণতে সম্পূৰ্ণ কৰিবলৈ দিয়া নহ’ব বুলি ছাত্ৰ সংগঠনটোৰ খেৰাজখাট সীমান্ত আঞ্চলিক ছাত্ৰই হুংকাৰ দিয়াৰ লগতে শীঘ্ৰে অৰুণাচলৰ ৰাজ্যপালগৰাকীয়ে তেওঁ কৰা মন্তব্যৰ বাবে দুয়োখন ৰাজ্যৰ জনসাধাৰণৰ ওচৰত ক্ষমা খোজা উচিত বুলি মত পোষণ কৰে।
প্ৰতিবাদী কাৰ্য্যসূচী ৰূপায়ণৰ সময়ত খেৰাজাত সীমান্ত আঞ্চলিক ছাত্ৰ সন্থাৰ উপদেষ্টা অৰবিন্দ হাজৰিকা, সভাপতি চম্পক বৰা, সম্পাদক হৰেন শইকীয়াকে ধৰি ভালেসংখ্যক ছাত্ৰ কৰ্মী উপস্থিত থাকে।
উল্লেখযোগ্য যে, আছুৰ উপৰিও অসম জাতীয়তাবাদী যুৱ ছাত্ৰ পৰিষদে অৰুণাচলৰ ৰাজ্যপালগৰাকীৰ মন্তব্যৰ প্ৰতিবাদত জুমুঠি দাহ কৰি প্ৰতিবাদ সাব্যস্ত কৰিছিল।
