ৰাজ্যত কোৱাৰেন্টাইনক লৈ ব্যাপক দুৰ্নীতি সংঘটিত হোৱাৰ অভিযোগ উত্থাপন কৰিছে কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে।
ছাত্ৰ মুক্তি সংগ্ৰাম সমিতিৰ কেন্দ্ৰীয় কাৰ্যকৰী সভাপতি আশ্ৰাফুল ইছলামে বৰপেটা জিলাৰ কলগাছিয়া মহকুমা সাংবাদিক সন্থাৰ কাৰ্যালয়ত আয়োজিত এক সংবাদমেলত আজি এই অভিযোগ উত্থাপন কৰে।
দুৰ্নীতিৰ ক্ষেত্ৰত শূন্য সহনশীলতাৰ শ্লোগান দিয়া সৰ্বানন্দ সোণোৱাল চৰকাৰৰ দিনত ক’ৰ’না মহামাৰীৰ লগত যুঁজিবলৈ সৃষ্টি কৰা কোৱাৰেন্টাইন কেন্দ্ৰ আৰু হোম কোৱাৰেন্টাইনৰ নামতো ব্যাপক দুৰ্নীতি সংঘটিত হৈছে বুলি আশ্ৰাফুলে অভিযোগ তোলে।
চৰকাৰৰ নিৰ্দেশনা অনুযায়ী কোৱাৰেন্টাইন কেন্দ্ৰত থকা লোক সকলৰ থকা-মেলা আৰু খোৱা-বোৱাৰ সু-ব্যৱস্থা কৰিব লাগে।
‘‘চৰকাৰৰ নিৰ্দেশনা অনুযায়ী খোৱা বাবদ প্ৰতিদিনে প্ৰতিজন ব্যক্তিৰ নামত ৫০০ টকাকৈ খৰচ কৰা হ’ব কিন্তু তাৰ পিছতো ৰাজ্যৰ বহু কোৱাৰেন্টাইন কেন্দ্ৰত লোকসকলক ভালকৈ থকা-মেলা আৰু খোৱা-বোৱাৰ সুবিধা প্ৰদান কৰা হোৱা নায়,’’ আশ্ৰাফুলে কয়।
একেদৰে, হোম কোৱাৰেন্টাইনত থকা ৪ জনীয়া পৰিয়াল এটাৰ বাবেও এক সপ্তাহৰ বাবে ১৫ কেজি চাউল, ২ কেজি দাইল, ২ লিটাৰ মিঠাতেল, ৫ কেজি আলু, ২ কেজি পিঁয়াজ, ১ কেজি নিমখ, শাক-পাচলি, গাখীৰ, কণী আৰু অন্যান্য অপৰিহাৰ্য বয়-বস্তুৰ বাবে ২০০০ টকাকৈ প্ৰদান কৰাৰ নিৰ্দেশনা দিয়া হৈছিল বুলি আশ্ৰাফুলে উল্লেখ কৰি হোম কোৱাৰেন্টাইনত থকা কোনো পৰিয়ালৰ লোকেই এতিয়ালৈ এই সুবিধা লাভ কৰা নাই বুলি মন্তব্য কৰে।
দুৰ্নীতিৰ ক্ষেত্ৰত শূন্য সহনশীলতাৰ শ্লোগান দিয়া সোণোৱাল চৰকাৰৰ দিনত ক’ৰ’না মহামাৰীৰ নামতো যে ব্যাপক অনিয়ম সংঘটিত হৈছে সেয়া চৰম লজ্জাৰ বিষয় বুলি ছাত্ৰমুক্তি সংগ্ৰাম সমিতিৰ নেতা গৰাকীয়ে কয়।
