কেইবাগৰাকী আৰক্ষী বিষয়াৰ বিৰুদ্ধে কৃষক মুক্তি সংগ্ৰাম সমিতিৰ গোচৰ
চুপাৰি মাফিয়াৰ সৈতে সম্পৰ্ক ৰক্ষাৰ অভিযোগত অসম আৰক্ষীৰ কেইবাগৰাকী আৰক্ষী বিষয়াৰ বিৰুদ্ধে কৃষক মুক্তি সংগ্ৰাম সমিতিৰ মহানগৰ জিলা সমিতিয়ে দিচপুৰ থানাত আজি এজাহাৰ দাখিল কৰিছে।
এজাহাৰত অভিযোগ কৰা হৈছে, যোৱা ৫ আগষ্টত গুৱাহাটী মহানগৰীৰ পঞ্চতাৰকা হোটেল ‘তাজ ভিভাণ্টা’ত কৰিমগঞ্জৰ আৰক্ষী অধীক্ষক মানবেন্দ্ৰ ৰায়ৰ উদ্যোগত চুপাৰি মাফিয়াৰ এজেণ্টৰ সৈতে গোপন বৈঠকত মিলিত হৈছিল আৰক্ষী বিষয়াকেইজন।
“বৈঠকত অসম পুলিচৰ এজন আই জি পি, চি আই ডিৰ জ্যেষ্ঠ আৰক্ষী অধীক্ষক ইন্দ্ৰানী বৰুৱা আৰু কামৰূপ গ্ৰাম্যৰ আৰক্ষী অধীক্ষক পাৰ্থ সাৰথি মহন্ত উপস্থিত আছিল।” -এই গুৰুতৰ অভিযোগ আনিছে সংগঠনটোৰ কামৰূপ মহানগৰ জিলাৰ সভাপতি পৃথ্বীৰাজ দলেই।
সংগঠনটোৱে মাফিয়াৰ সৈতে আৰক্ষী বিষয়াৰ গোপন বৈঠকৰ পুংখানুপুংখ তদন্ত বিচাৰি দিচপুৰ থানাৰ ভাৰপ্ৰাপ্ত আৰক্ষী বিষয়াৰ হাতত এজাহাৰখন দাখিল কৰে। লগতে দোষী আৰক্ষী বিষয়াক গ্ৰেপ্তাৰৰো দাবী কৰে সংগঠনটোৱে।
আনহাতে, এজাহাৰ দিছে যদিও বৰ্তমানলৈকে আৰক্ষীৰ ফালৰ পৰা গোচৰ নম্বৰ আৰু ধাৰাসমূহ জানিব পৰা নাই, নৰ্থ-ইষ্ট নাওক জনালে সংগঠনটোৱে।
উল্লেখ কৰিব পাৰি যে, এই বিষয়ক লৈ যোৱা ১০ আগষ্টত কৃষক মুক্তি সংগ্ৰাম সমিতিৰ উপদেষ্টা অখিল গগৈ সৰৱ হোৱাৰ লগতে আৰক্ষী সঞ্চালক প্ৰধানক ইয়াৰ উচিত তদন্ত কৰি দোষীক গ্ৰেপ্তাৰৰ বাবে দাবী জনাইছিল।