সোমবাৰে নিশা আই পি এলৰ ক্ৰিকেট অনুৰাগীয়ে চলিত ছিজনৰ প্ৰথমখন উত্তেজনাপূৰ্ণ মেচ প্ৰত্যক্ষ কৰে। আশুতোষ শৰ্মাই প্ৰায় এককভাৱে লক্ষ্ণৌৰ হাতৰ পৰা মেচখন কাঢ়ি লৈ দিল্লীৰ ভাগ্য সলনি কৰিলে।
আশুতোষৰ ৩১টা বলত ৬৬ ৰানৰ দুৰ্দান্ত ইনিংছে ২৬ বছৰীয়া বেটছমেনগৰাকীৰ নামত ফিনিছাৰৰ খিতাপ সংযোজন কৰিলে।
২২ গজত ইয়াৰ পূৰ্বেও ইমপেক্ট প্লেয়াৰ হিচাপে আশুতোষ শৰ্মাৰ প্ৰদৰ্শন দেখা গৈছে। পঞ্জাৱৰ জাৰ্চি পিন্ধা শশাংক সিঙক লৈ তেওঁ পঞ্জাৱ কিংছক জয়ৰ দিশে আগুৱাই লৈ গৈছিল। কিন্তু এই ছিজনত পঞ্জাবে তেওঁক চুক্তিবদ্ধ নকৰাৰ বাবে দিল্লী কেপিটেলে ষ্ট্ৰেটেজিক মুভত আশুতোষক নিলামত লৈ যায়।
সোমবাৰে যেতিয়া দিল্লীৰ ‘শৰ্মাজী কা বেটা’ ক্ৰীজলৈ আহিছিল, তেতিয়া স্ক’ৰব’ৰ্ডত ৬৫ ৰানত ৫ টা উইকেট আছিল। তেতিয়া কাগজে কলমে থকা তাৰকা বেটছমেনসকল ড্ৰেছিং ৰুমলৈ উভতি আহিছে। এল এছ জিৰ ২১০ ৰানৰ লক্ষ্য খেদি অক্ষৰ পেটেলৰ দিল্লীয়ে ৫টা উইকেট হেৰুৱাই সংগ্ৰাম কৰি আছিল। সেই সময়ত ইমপেক্ট প্লেয়াৰ শৰ্মা খেলপথাৰলৈ আহিছিল।
জয়ৰ গোন্ধ পাই লক্ষ্ণৌৰ আত্মবিশ্বাস তুংগত আছিল। তাৰ পৰাই আশুতোষে লাষ্ট অভাৰৰ থ্ৰিলাৰলৈ মেচখন টানি আনে। তেওঁৰ বেটিঙৰ পৰাক্ৰমতে ৩টা বল বাকী থকা অৱস্থাত দিল্লীয়ে মেচখনত জয়লাভ কৰে। আশুতোষক যোগ্য সংগ দিয়ে ট্ৰিষ্টান ষ্টাবছ আৰু ভিপৰাজ নিগমে।
আশুতোষ শৰ্মাৰ জন্ম হৈছিল ১৯৯৮ চনৰ ১৫ ছেপ্টেম্বৰত মধ্যপ্ৰদেশৰ ৰাটলামত। এইগৰাকী প্ৰতিভাৱান ক্ৰিকেটাৰে ৰাটলামত অধ্যয়ন কৰিছিল যদিও পিছলৈ ইন্দোৰলৈ গুচি যায়। চন্দ্ৰকান্তে পণ্ডিতৰ পৰা ক্ৰিকেটৰ প্ৰশিক্ষণ লৈছিল। অৱশ্যে প্ৰথম ক্ৰিকেটৰ পাঠ লৈছিল মেন্টৰ ভূপেন চৌহানৰ ওচৰত। ২০২৩ চনত ৰে’লৱেৰ হৈ খেলাৰ সুযোগ পাইছিল আশুতোষে।
ইয়াৰ পিছত ২০২৪ চনত আই পি এলত পোৱা এটা সুযোগে আশুতোষৰ জীৱন সলনি কৰি পেলালে। প্ৰথম নিলামত তেওঁৰ দাম আছিল মাত্ৰ ২০ লাখ টকা। পঞ্জাৱৰ হৈ আশুতোষৰ স্ক’ৰ আছিল ১১খন মেচত ১৮৯ ৰান।
ইয়াতেই শেষ নহয়, ভাৰতীয় ক্ৰিকেটাৰ হিচাপেও তেওঁৰ নামত এটা অভিলেখ আছে। টি-২০ত মাত্ৰ ১১টা বলত অৰ্ধশতক অৰ্জন কৰি তেওঁ এক অভিলেখ গঢ়ি তুলিছিল। ক্ৰিকেট বিশেষজ্ঞৰ মতে আই পি এলৰ অন্যতম আৱিষ্কাৰ হ’বলৈ গৈ আছে আশুতোষ শৰ্মা। সোমবাৰে নিশাৰ পিছত ক্ৰিকেট জগতে তেওঁক আশুতোষ ‘ইমপেক্ট’ শৰ্মা বুলি অভিহিত কৰি আহিছে।
