ভাৰতৰ কেইবাখনো ৰাজ্যত কম বয়সতে বিবাহৰ প্ৰৱণতা এতিয়াও আছে। কিন্তু আধুনিক জীৱনৰ প্ৰেক্ষাপটত বহুতে পেছাদাৰী প্ৰতিষ্ঠা আৰু মানসিক প্ৰস্তুতিৰ পিছতহে বিবাহপাশত আবদ্ধ হয়। অৱশ্যে মা-আইতাহঁতে এতিয়াও কৈ থাকে সোনকালে বিয়া পতা নহ’লে বহুত সমস্যা হ’ব পাৰে।
কিন্তু বহু বিশেষজ্ঞৰ মতে অলপ বেছি বয়সত পতা বিবাহৰ কিছু অসাধাৰণ উপকাৰিতাও আছে। চেণ্টাৰ ফৰ মেন্টেল হেল্থৰ মুখ্য ক্লিনিকেল চাইক’লজিষ্ট নুপুৰ ঢাকেফলকাৰে কয়, ‘বিবাহৰ বাবে প্ৰস্তুতিৰ অৰ্থ কেৱল প্ৰেমেই নহয়, ইয়াৰ লগত মানসিক স্থিতিশীলতা, আত্মসন্মান, প্ৰতিশ্ৰুতি আৰু ভৱিষ্যতৰ পৰিকল্পনাও জড়িত হৈ থাকে।’ কিন্তু কম বয়সতে নে অলপ বয়স হোৱাত বিয়া হ’ব, সেয়া সম্পূৰ্ণ দুজন প্ৰাপ্তবয়স্কৰ সিদ্ধান্তৰ ওপৰত নিৰ্ভৰ কৰে।
পলমকৈ বিয়া পাতিলে কি লাভ হয়?
• আৰ্থিক স্থিতিশীলতা লাভ
বয়স বৃদ্ধিৰ লগে লগে মানুহ নিজৰ কেৰিয়াৰত প্ৰতিষ্ঠিত হৈ উঠে। ফলত তেওঁলোক আৰ্থিকভাৱে স্বাৱলম্বী হৈ পৰে। ইয়াৰ ফলত সম্পৰ্ক আৰ্থিক চাপৰ পৰা মুক্ত হৈ থাকে আৰু বৈবাহিক জীৱন অধিক শান্তিপূৰ্ণ হয়।
• সম্পৰ্কৰ গভীৰতা বুজিব পৰা ক্ষমতা
কম বয়সত সম্পৰ্কবোৰ প্ৰায়ে আৱেগৰ ওপৰত ভিত্তি কৰি গঢ় লৈ উঠে, আনহাতে পৰিণত বয়সত মানুহে সম্পৰ্কক দায়িত্ব আৰু বুজাবুজিৰ ঠাইৰ পৰাই চায়। ইয়াৰ ফলত বিবাহিত জীৱনত দীৰ্ঘস্থায়ী মিলাপ্ৰীতিৰ সৃষ্টি হয়।
• নিজকে চিনি পোৱাৰ সুযোগ
দেৰিকৈ বিয়া কৰালে নিজৰ পছন্দ-অপছন্দ, জীৱনৰ মূল্যবোধ আৰু ভৱিষ্যতৰ পৰিকল্পনা ভালদৰে বুজিব পাৰি। এই আত্ম-অন্বেষণে এজনক উপযুক্ত জীৱন সংগী বাছি লোৱাত সহায় কৰে।
• আৱেগিক পৰিপক্কতা
বয়সৰ লগে লগে সংবেদনশীলতা আৰু ধৈৰ্য্য বাঢ়ি যায়। পলমকৈ বিয়া পতা ব্যক্তিয়ে সাধাৰণতে বিবাহিত জীৱনৰ প্ৰত্যাহ্বানসমূহ অধিক শান্ত আৰু যুক্তিসংগতভাৱে চম্ভালিব পাৰে। কাজিয়া কম হয়, বুজাবুজি বাঢ়ি যায়।
• পৰিয়াল আৰু কৰ্মজীৱনৰ মাজত ভাৰসাম্য ৰক্ষা কৰাটো সহজ
বয়সৰ লগে লগে দায়িত্ববোধো বাঢ়ি যায়। দেৰিকৈ বিয়া কৰাই এজন ব্যক্তিয়ে সময় ফলপ্ৰসূভাৱে পৰিচালনা কৰিব পাৰে, পৰিয়াল আৰু কৰ্মজীৱনৰ মাজত ভাৰসাম্য ৰক্ষা কৰিব পাৰে।
