কোকৰাঝাৰ অভয়াখুটিৰ চাঞ্চল্য ঘটনাত জড়িত পাঁচজন অভিযুক্তক গ্ৰেপ্তাৰ ।
গ্ৰেপ্তাৰ হোৱা অভিযুক্ত হল ক্ৰমে ধুবুৰীৰ হানিফ শেখ(২০), কোকৰাঝাৰৰ জাহানুৰ ইছলাম(২৩), শংকৰদেৱ বৰ্মন(২৭), মহম্মদ আফটাফ আলী(২৬) আৰু মোজামেল শেখ(২০)। কোকৰাঝাৰ আৰক্ষী থানাত ৰুজু কৰা গোচৰ নং ৪৪০/২০২১ ইউ /এছ ১২০(বি)/৩০২ আই পি চি ত গ্ৰেপ্তাৰ কৰি তদন্ত অব্যাহত ৰাখিছে কোকৰাঝাৰ আৰক্ষীয়ে।
পোষ্ট মৰ্টেম প্ৰতিবেদন কাইলৈ পোৱাৰ সম্ভাৱনা আছে। পি এম ৰিপৰ্টৰ পিছতহে স্পষ্ট হব চাঞ্চল্যকৰ ঘটনাটোৰ ৰহস্য।
ইতিমধ্যে কোকৰাঝাৰ আৰক্ষীয়ে তদন্ত প্ৰক্ৰিয়া অব্যাহত ৰাখিছে বুলি উল্লেখ কৰিছে কোকৰাঝাৰ জিলা আৰক্ষী অধীক্ষক প্ৰতীক বিজয় টুৱেই |
কোকৰাঝাৰ অভয়াখুটি গাওঁত শুকুৰবাৰে সংঘটিত দুজনী কিশোৰীৰ চাঞ্চল্যৰ মৃত্যুৰ পৰিস্থিতিৰ বুজ ল’বলৈ আজি কোকৰাঝাৰত উপস্থিত হয় মুখ্যমন্ত্ৰী ডঃ হিমন্ত বিশ্ব শৰ্মা।
ঘটনাস্থলীত পুৱা ১১.১৮ বজাত উপস্থিত হৈ তেওঁ ভুক্তভোগী পৰিয়ালৰ সদস্য সকলৰ সৈতে বাৰ্তালাপ কৰে। ঘটনাৰ সম্পূৰ্ণ পৰিস্থিতি তথা চৰজমিন তদন্ত কৰি মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰে যে দুয়োজনী জনজাতি ছোৱালীৰ মৃত্যু হত্যা নে আত্মহত্যা সেয়া তদন্তৰ পিছত ওলাই পৰিব। হত্যা হ’লে দোষীয়ে শাস্তি পাব আৰু আত্মহত্যা হ’লে আত্মহত্যাৰ কাৰণ উলিওৱা হব।
ইপিনে, মৃত্যু হোৱা কিশোৰী সৈতে কথা বতৰা পতা লোকৰ সম্ভেদ পোৱা গৈছে আৰু এইক্ষেত্ৰত চাৰি পাঁচজন লোকক সোধপোছৰ বাবে ইতিমধ্যে আৰক্ষীয়ে আটক কৰিছে।
আনহাতে, দুৰাৰোগ্য ৰোগত পুনৰ আক্ৰান্ত হৈ দিল্লীৰ এইমছত কালি সন্ধিয়া চিকিৎসাৰ বাবে যোৱা ৰাষ্ট্ৰীয় সোণৰ পদক বিজয়ী আৰ্চাৰ গহেলা বড়োৰ খবৰ লোৱা বুলিও সংবাদ মাধ্যমৰ আগত সদৰী কৰে মুখ্য মন্ত্ৰী ডঃ হিমন্ত বিশ্ব শৰ্মাই।
