উচ্চতম ন্যায়ালয়ৰ নিৰ্দেশ অনুসৰি সাৰদা চীট ফাণ্ড কেলেংকাৰিত অভিযুক্ত কলকাতাৰ আৰক্ষী আয়ুক্ত ৰাজীৱ কুমাৰ চি বি আইৰ শ্বিলংস্থিত কাৰ্যালয়ত হাজিৰ হোৱাৰ উদ্দেশ্যে আজি মেঘালয়ত উপস্থিত হ’ব।
তেওঁক কাইলৈ অৰ্থাৎ শনিবাৰে শ্বিলঙৰ চি বি আই কাৰ্যালয়ত হাজিৰ হোৱাৰ নিৰ্দেশ দিয়া হৈছে।
প্ৰাপ্ত তথ্য মতে আৰক্ষী আয়ুক্ত গৰাকীয়ে তেওঁৰ ভাতৃ আৰু ৩ গৰাকী সহযোগী আই পি এছ বিষয়াৰ সৈতে কলকাতাৰ পৰা বিমাণেৰে গুৱাহাটী হৈ শ্বিলঙলৈ আহিব। আজি দিনৰ ১.৩০ বজাত এ আই ৯৭১১ বিমাণেৰে তেওঁ কলকাতাৰ পৰা গুৱাহাটী উৰা মাৰে।
গুৱাহাটীৰ পৰা তেওঁ পথেৰে শ্বিলঙলৈ গৈ আজি ৰাতিটো মেঘালয় আৰক্ষী অতিথিশালাত থাকিব।
উল্লেখযোগ্য যে সাৰদা চীট ফাণ্ড কেলেংকাৰিত আৰক্ষী আয়ুক্ত ৰাজীৱ কুমাৰৰ বিৰুদ্ধে থকা তথ্য নষ্ট কৰাৰ অভিযোগ উত্থাপন হৈছিল। চি বি আইয়ে তেওঁৰ বিৰুদ্ধে তথ্য নষ্ট কৰাৰ প্ৰমাণ বন্ধ খামত আদালতত জমা দিছিল।
ইয়াৰ পিছত যোৱা ৫ ফেব্ৰুৱাৰিত ৰঞ্জন গগৈ নেতৃত্বাধীন উচ্চতম ন্যায়ালয়ৰ খণ্ড বিচাৰপীঠে ৰাজীৱ কুমাৰক চি বি আইৰ ওচৰত হাজিৰ হৈ সাৰদা কেলেংকাৰিৰ তদন্তৰ খাতিৰত ‘বিশ্বাসযোগ্যভাৱে’ সহযোগ আগবঢ়াবলৈ নিৰ্দেশ দিয়ে।
