গুৱাহাটীৰ সৰু মটৰীয়াত থকা এই ভাড়াঘৰটো প্ৰাক্তন মুখ্য মন্ত্ৰী প্ৰয়াত হিতেশ্বৰ শইকীয়াৰ পৰিয়ালৰ। ঘৰটোৰ ভাড়াতীয়া হ’ল প্ৰাক্তন প্ৰধান মন্ত্ৰী ড০ মনমোহন সিং।
লোকসভা নিৰ্বাচনৰ তৃতীয় পৰ্য্যায়ৰ ভোটগ্ৰহণৰ দিন কাইলৈ, অৰ্থাৎ ২৩ এপ্ৰিলত ভোট দিবলৈ গুৱাহাটীলৈ সপত্নীক আহিব প্ৰাক্তন প্ৰধান মন্ত্ৰী মনমোহন সিং। মহানগৰখনৰ সৰু মটৰীয়াৰ ভোটাৰ তালিকাত নাম আছে প্ৰাক্তন প্ৰধান মন্ত্ৰীজনৰ।
ভোটাধিকাৰ সাব্যস্ত কৰিবলৈ অহাৰ সুযোগতে বহু দিনৰ মূৰত নিজৰ ভাড়াঘৰটোত এপাক সোমাই যাব ড০ সিং আৰু তেওঁৰ পত্নী। গুৱাহাটীৰ সৰুমটৰীয়াৰ নন্দন নগৰত থকা ৰাজ্যৰ প্ৰাক্তন মুখ্য মন্ত্ৰী প্ৰয়াত হিতেশ্বৰ শইকীয়াৰ বাসগৃহৰ এটা অংশ ১৯৯৪ চনৰ পৰাই ভাড়াত লৈ আছে ড০ সিঙে।
গতিকে সন্মানীয় আৰু আকাংক্ষিত ভাড়াতীয়াগৰাকী আৰু তেওঁৰ পত্নীক আদৰিবলৈ মালিকে ভাড়াঘৰটো চাফ-চিকুণ কৰাইছে।
প্ৰাক্তন প্ৰধান মন্ত্ৰীজন আৰু তেওঁৰ পত্নীয়ে কাষৰে দিচপুৰ চৰকাৰী উচ্চতৰ মাধ্যমিক বিদ্যালয়ত থকা ভোট কেন্দ্ৰটোত ভোটদান কৰি আহিছে। ভোটাৰ তালিকাত তেওঁ ক্ৰমিক নম্বৰ ৬২৩ আৰু তেওঁৰ পত্নী গুৰচৰণ কৌৰৰ ক্ৰমিক নম্বৰ ৬২৪।
১৯৯১ চনৰ পৰা অসমৰ ৰাজ্যসভাৰ সাংসদ হৈ থকা মনমোহন সিঙে নিৰ্বাচন আয়োগত দাখিল কৰা শপতনামাতো নন্দন নগৰত থকা এই ঘৰটোৰ ঠিকনাই ব্যৱহাৰ কৰে।
কাইলৈ ভোটদানৰ পাছতেই দুয়ো ভাড়াঘৰটোলৈ যাব বাবে চাফ-চিকুণ কৰাৰ উপৰি কটকটীয়া কৰি তোলা হৈছে নিৰাপত্তা ব্যৱস্থা।
ইপিনে ভাড়াতীয়া তথা প্ৰাক্তন প্ৰধান মন্ত্ৰীগৰাকী আহিব বুলি জানি আনন্দিত ঘৰৰ মালিক হেমপ্ৰভা শইকীয়া।
“ড০ মনমোহন সিঙে ভোট দিবলৈ আহি ইয়াত সোমাব বুলি আমাক জানিবলৈ দিছে। ইয়াৰ আগতেও ভোট দিবলৈ আহি ইয়াত তেওঁ সোমাই গৈছিল, কিন্তু সেই সময়ত আমি ঘৰত নাছিলো। এইবাৰ আমি ইয়াতেই থাকিম। গতিকে তেওঁক লগ পাম”, হেমপ্ৰভা শইকীয়াই কয়।
আৰম্ভণিৰে পৰা ঘৰটোৰ ভাড়া ৮,৪০০ টকাই হৈ আছে বুলি আমাক ঘৰটোৰ গৰাকী প্ৰাক্তন মন্ত্ৰী হেমপ্ৰভা শইকীয়াই জানিবলৈ দিছে। তেওঁ জনায় যে ঘৰৰ ভাড়া নিবিচাৰে যদিও ড০ সিঙে নিজেই পঠিয়াই দিয়ে।
মনমোহন সিং আহিব বাবেই তেওঁৰ ভাড়াঘৰৰ উপৰি ভোটদান কৰিব লগীয়া দিচপুৰ চৰকাৰী উচ্চতৰ মাধ্যমিক বিদ্যালয়ৰ ভোটদান কেন্দ্ৰটোতো নিৰাপত্তা ব্যৱস্থা গঢ়ি তোলা হৈছে।
