২৪ ৰ নিৰ্বাচন যিমানেই কাষ চাপি আহিছে, সিমানেই তৎপৰতা বাঢ়িছে শাসকীয় NDA আৰু বিৰোধী INDIA ৰ। দুবাৰকৈ ইতিমধ্যে একেলেঠাৰিয়ে ক্ষমতাত থকা NDA ৰ নেতৃত্বক লৈ কোনো প্ৰশ্ন নাথাকিলেও বিৰোধী মিত্ৰজোঁটৰ নেতৃত্ব কোনে ল’ব, সেই লৈ কিন্তু ব্যাপক চৰ্চা হৈছে।
বিৰোধী মিত্ৰজোঁট INDIAৰ নেতা কোন হ’ব, সেয়া জানিবলৈ যেন উৎসুক শ্ৰীলংকাৰ ৰাষ্ট্ৰপতিও। সেয়ে ডুবাইৰ বিমান বন্দৰতে মমতা বেনাৰ্জীক শ্ৰীলংকাৰ ৰাষ্ট্ৰপতি ৰনিল ৱিক্ৰেমেসিংহেই প্ৰশ্ন কৰে, ‘আপুনি ল’ব নেকি বিৰোধীৰ নেতৃত্ব?’
উল্লেখ্য যে, পশ্চিম বংগৰ মুখ্যমন্ত্ৰী মমতা বেনাৰ্জীয়ে বিনিয়োগৰ সন্ধানত স্পেইনলৈ যাত্ৰা কৰিছে। এই যাত্ৰাপথতে ডুবাই বিমানবন্দৰত শ্ৰীলংকাৰ ৰাষ্ট্ৰপতি ৰনিল ৱিক্ৰেমেসিংহেৰ সৈতে আকস্মিক সাক্ষাৎ হয়।
দুয়ো এই সাক্ষাতৰ সময়তে বিভিন্ন বিষয়ৰ ওপৰত বাৰ্তালাপ কৰে। তেতিয়াই ৰাষ্ট্ৰপতিগৰাকীয়ে মমতা বেনাৰ্জীক উদ্দেশ্যি সোধে, “মই আপোনাক এটা প্ৰশ্ন সুধিব পাৰোনে?”
বেনাৰ্জীয়ে সন্মতি দিয়াৰ পিছতে ৱিক্ৰেমেসিংহেই পুনৰ সোধে, “আপুনি বিৰোধী মিত্ৰজোঁটক নেতৃত্ব দিবনে? আমি সকলোৱে আচৰিত হৈছো।” এই আকস্মিক প্ৰশ্নত আশ্চৰ্য প্ৰকাশ কৰি বেনাৰ্জীয়ে কৈ উঠে, “অ’ মাই গুডনেছ!”
তাৰ পিছতে তেওঁ হাঁহি হাঁহি কয় যে এয়া জনসাধাৰণৰ ইচ্ছাৰ ওপৰত নিৰ্ভৰ কৰে। “যদি জনসাধাৰণে আমাক সমৰ্থন কৰে, তেন্তে কাইলৈ আমি পদবীত থাকিব পাৰো।”- মমতা বেনাৰ্জীয়ে লগতে কয়।
সূত্ৰ অনুসৰি এই সাক্ষাতৰ সময়ত শ্ৰীলংকাৰ ৰাষ্ট্ৰপতিগৰাকীয়ে মমতা বেনাৰ্জীক এখন ছবিও উপহাৰ স্বৰূপে আগবঢ়ায়।
