নামমাত্ৰ আশ্ৰয়ৰ বাবে বাটকুৰি বাই ফুৰি জীৱনৰ ২৮ টা বসন্ত গৰকা মানসিক বিকাৰগ্ৰস্ত এজন যুৱকৰ এক দুৰ্বিসহ কাহিনীয়ে সাধাৰণ জনতাক ভীতিগ্ৰস্ত কৰি তোলাৰ সময়তে নগাওঁ জিলা আইন সেৱা প্ৰাধিকৰণে বুধেন ডেকা নামৰ মানসিক বিকাৰগ্ৰস্ত যুৱকগৰাকীৰ দায়িত্ব লৈছে।
আত্মীয়-স্বজনৰ মৰমৰ পৰা বিতাড়িত হৈ আশ্ৰয়হীন হোৱা এই যুৱকজনক বহু দিনৰ পৰা ৰহাৰ ফুলগুৰি গাঁৱৰ বহু লোকে প্ৰত্যক্ষ কৰি আহিছিল। কিন্তু কোনো সভ্যলোক আগবাঢ়ি আহি তেওঁৰ দায়িত্ব লোৱা নাছিল। একাংশ লোকৰ পৰা বুধেন ডেকাৰ এনে কৰুণ কাহিনীৰ খবৰ লাভ কৰি তেওঁক সহায় কৰিবলৈ নগাওঁ জিলা আইন সেৱা প্ৰাধিকৰণ আগুৱাই আহে।
উল্লেখ্য যে, আজি প্ৰাধিকৰণৰ হৈ অধিবক্তা ৰূপালী গোস্বামী আৰু পিংকু গোস্বামীয়ে ৰহা আৰক্ষীৰ সহযোগত বুধেন ডেকাক আইন সেৱা প্ৰাধিকৰণৰ তত্বাৱধানলৈ আনে।
আনহাতে, আইন সেৱা প্ৰাধিকাৰীয়ে নগাঁও জিলাৰ প্ৰথমে নগাঁও জিলা মুখ্য ন্যায়িক দণ্ডাধীশৰ আদালতত উপস্থাপন কৰাৰ পাছত নগাঁও অসামৰিক চিকিৎসালয়ৰ মানসিক ৰোগ বিভাগত চিকিৎসকৰ পৰামৰ্শ গ্ৰহণ কৰি চিকিৎসালয়ৰ মানসিক বিভাগৰ বিশেষ কোঠাত কেইদিনমানৰ বাবে ৰখাৰ ব্যবস্থা কৰে।
ইপিনে, পৰৰ্বতী সময়ত জিলা ন্যায় সেৱা প্ৰাধিকৰণে উন্নত চিকিৎসা প্ৰদানৰ ব্যৱস্থা কৰিব বুলি জানিব পৰা গৈছে।
