আগন্তুক দিল্লী বিধানসভা নিৰ্বাচনত বাওঁপন্থীয়ে ছখন আসনত প্ৰতিদ্বন্দ্বিতা কৰিব। দিল্লীৰ বিধান সভাত ৭০ টা সমষ্টি আছে যদিও মাত্ৰ ৬ টা সমষ্টিতহে প্ৰতিদ্বন্দ্বিতা কৰাৰ সিদ্ধান্ত লৈছে বাওঁপন্থী দলসমূহে।
ইয়াৰ ভিতৰত চিপিআইএমে দুখন আসনত প্ৰতিদ্বন্দ্বিতা কৰিব।
বৃহস্পতিবাৰে ৰাঁচীৰ এক অনুষ্ঠানত এই ঘোষণা কৰে দলটোৰ পলিটব্যুৰোৰ সদস্য বৃন্দা কাৰাটে।
বৃহস্পতিবাৰৰ পৰা ৰাঁচীত আৰম্ভ হৈছে চিপিআইএমৰ অষ্টম ঝাৰখণ্ড সাধাৰণ সন্মিলন। এই সন্মিলন শনিবাৰে শেষ হ’ব। সন্মিলনত অংশগ্ৰহণৰ বাবে বৃহস্পতিবাৰে ৰাঁচীত উপস্থিত আছিল পলিটব্যুৰোৰ সদস্য বৃন্দা কাৰাট।
তেওঁ উক্ত সভাত কয় যে দিল্লী বিধানসভা নিৰ্বাচনত বাওঁপন্থী দলসমূহে ছয়খন আসনত প্ৰাৰ্থী প্ৰক্ষেপ কৰিব। ইয়াৰে দুখনত চিপিআইএময়ে প্ৰতিদ্বন্দ্বিতা কৰিব। ইয়াৰ উপৰিও বাকী আসনত বিজেপিৰ বিৰুদ্ধে শক্তিশালী প্ৰাৰ্থীক সমৰ্থন কৰিব দলটোৱে।
বৃন্দাই কয়, বাকী দলসমূহে ইতিমধ্যে দিল্লী নিৰ্বাচনৰ প্ৰাৰ্থী ঘোষণা কৰিছে। বাওঁপন্থীয়ে ছখন আসনত প্ৰতিদ্বন্দ্বিতা কৰাৰ সিদ্ধান্ত লৈছে।
চিপিআইএমৰ নেতাগৰাকীয়ে লগতে কয় যে দিল্লীৰ জনসাধাৰণে কাক নিৰ্বাচন কৰিব সেয়া দিল্লীৰ জনসাধাৰণে নিৰ্ধাৰণ কৰিব। মই নিশ্চিত যে তেওঁলোকে বিজেপিক পৰাস্ত কৰিব। কাৰণ বিগত পাঁচ বছৰত বিজেপিয়ে এনেকুৱা কোনো কাম কৰা নাই য’ত দিল্লীবাসীৰ অধিকাৰ খৰ্ব হোৱা নাই।
৫ ফেব্ৰুৱাৰী, বুধবাৰে দিল্লী বিধানসভাৰ ৭০খন আসনৰ বাবে ভোটগ্ৰহণ অনুষ্ঠিত হ’ব। ভোটগণনা হ’ব – ৮ ফেব্ৰুৱাৰী, শনিবাৰে।
