ক’ৰ’ণাতংকৰ বাবেই অসম উচ্চতৰ মাধ্যমিক শিক্ষা সংসদে দ্বাদশ শ্ৰেণীৰ ছাত্ৰ-ছাত্ৰীৰ বাবে ৩০ শতাংশ পাঠ্যক্ৰম হ্ৰাস কৰিছে। সেইমৰ্মে পাঠ্যক্ৰমৰ পৰা বাদ দিয়া হৈছে জৱপৰলাল নেহৰু,ইন্দিৰা গান্ধী বিষয়ক পাঠৰ লগতে আন কেইবাটাও পাঠ।
ফলত দ্বাদশ শ্ৰেণীৰ ছাত্ৰ-ছাত্ৰীয়ে অধ্যয়ন কৰিব নালাগে ভাৰতৰ প্ৰথম প্ৰধানমন্ত্ৰী জৱাহৰলাল নেহৰুৰ কৰ্মৰাজিকলৈ প্ৰস্তুত কৰা পাঠ।
অসম উচ্চতৰ মাধ্যমিক শিক্ষা সংসদে দ্বাদশ শ্ৰেণীৰ ৰাজনীতি বিজ্ঞানৰ পাঠ্যক্ৰমৰ পৰা কৰ্তন কৰিছে ১৯৮৪ চনৰ শিখ নিধন যজ্ঞ, ২০০২ চনৰ গুজৰাটৰ সাম্প্ৰদায়িক সংঘৰ্ষ, অযোধ্যাৰ ভূমি বিবাদ আদি পাঠসমূহ।
ইয়াৰ লগতে পাঠ্যক্ৰমৰ পৰা আঁতৰাই পেলোৱা হৈছে – ২০০৪ চনৰ সাধাৰণ নিৰ্বাচন, দেশ নিৰ্মাণত নেহৰুৰ অৱদান, নেহৰুৰ সময়ৰ পঞ্চবাৰ্ষিক পৰিকল্পনা, নেহৰুৰ বিদেশ নীতি, নেহৰুৰ পিছৰ ৰাজনৈতিক প্ৰেক্ষাপট, ইন্দিৰা গান্ধীৰ গৰিবী হাটাও আদি পাঠ সমূহ।
মণ্ডল আয়োগ সম্পৰ্কীয় পাঠো কৰ্তন কৰা হৈছে।
অসম উচ্চতৰ মাধ্যমিক শিক্ষা সংসদৰ সচিব মনোৰঞ্জন কাকতিয়ে প্ৰকাশ কৰা মতে বিশেষজ্ঞ ব্যক্তি আৰু বিশিষ্ট শিক্ষাবিদৰ পৰামৰ্শ মতেহে পাঠ সমূহ কৰ্তন কৰা হৈছে।
পাঠ কৰ্তনৰ সৈতে ৰাজনীতিৰ কোনো সম্পৰ্ক নাই বুলিও শিক্ষা সংসদৰ সূত্ৰই স্পষ্ট কৰি দিছে।
