মুঠ ৬৫০০জন ৰোগীক চিকিৎসা দিয়াৰ পিছত ধুবুৰীৰ গৌৰীপুৰৰ পৰা বিদায় ল’বলৈ সাজু হৈছে “জীৱনৰেখা এক্সপ্ৰেছ” বা লাইফলাইন এক্সপ্ৰেছ (এল এল ই)।
বিনামূলীয়া চিকিৎসাসেৱাৰ সুবিধা আৰু অভিজ্ঞ চিকিৎসকৰ দল থকা বিশেষ ৰেইলগাড়ীখন যোৱা ১৮ জানুৱাৰিৰ পৰা ষ্টেইশ্যনটোত থাকি দুখীয়া ৰোগীসকলক বিনামূলীয়া চিকিৎসা সেৱা আগ বঢ়ায়।
ইম্পেক্ট ইণ্ডিয়া ফাউণ্ডেইশ্যনৰ প্ৰকল্প মেনেজাৰ ডাঃ জছবিৰ সিংঙে জানিবলৈ দিয়া মতে, এইটো আছিল বিশেষ ৰেইলগাড়ীখনৰ জৰিয়তে লোৱা ২০৬ সংখ্যক প্ৰকল্প।
৬৫০০জন ৰোগীৰ ভিতৰত ৫১৮টা অস্ত্ৰোপচাৰ চিকিৎসা কৰা হয় আৰু ইয়াৰ ভিতৰত ৪২৬টা কেটেৰেক্ট, ৭৪টা ই এন টি, ১৮টা প্লাষ্টিক চাৰ্জাৰি (ওঁঠ ফটা), আৰু ৪০টা শিশুৰ অস্থি চিকিৎসা।
ইয়াৰ উপৰি ৪০০জনলৈ কেন্সাৰ স্ক্ৰীনিং আগ বঢ়োৱা হয়।
ধুবুৰীৰ পৰা ৰেইলগাড়ীখন অৰুণাচলৰ নাহৰলগুন ষ্টেইশ্যনলৈ যাব আৰু তাত ১৭ ফেব্ৰুৱাৰিৰ পৰা ৫ মাৰ্চলৈকে একেদৰে চিকিৎসাসেৱা আগ বঢ়াব।
“জীৱনৰেখা এক্সপ্ৰেছ” বা লাইফলাইন এক্সপ্ৰেছ ১৯৯১ চনতে আৰম্ভ কৰা হৈছিল। ই হ’ল বিশ্বৰ ভিতৰতে প্ৰথম চিকিৎসা ৰে’ল। প্ৰধানকৈ প্ৰান্তীয় অঞ্চলবোৰত থকা লোকসকলক চিকিৎসা সেৱা আগ বঢ়োৱাৰ বাবে এয়া আছিল এখন চৰকাৰী আঁচনি। ই ইম্পেক্ট ইণ্ডিয়া ফাউণ্ডেইশ্যন আৰু ভাৰতীয় ৰেইলৱে’ৰ যুটীয়া উদ্যোগত এই আঁচনিখন লোৱা হৈছে। ইয়াৰ প্ৰথম শুভাৰম্ভ কৰা হৈছিল ছত্ৰপতি শিৱাজী মহাৰাজ টাৰ্মিনাছৰ পৰা, ১৯৯১ চনৰ ১৬ জুলাইত।
সমৰণি অনুষ্ঠানত ভাষণ দি ডাঃ সিঙে কয়, “আমি অকলে সামান্য কিবা কৰিব পাৰো, কিন্তু একেলগে বহুত কিবা কৰিব পাৰো”।
ইম্পেক্ট ইণ্ডিয়া ফাউণ্ডেইশ্যনে সহযোগিতাৰ বাবে ধুবুৰীৰ উপায়ুক্ত অনন্তলাল গিয়ানী, ধুবুৰী প্ৰকল্পটোৰ সমন্বয় বিষয়া অনুপ কুমাৰ ব্ৰহ্ম, ধুবুৰী জিলা স্বাস্থ্যসেৱাৰ যুটীয়া সঞ্চালক ডাঃ ইমদাদুল্লাহ, গৌৰীপুৰ পি বি কলেজৰ অধ্যক্ষ আৰু অন্যান্যসকললৈ কৃতজ্ঞতা জ্ঞাপন কৰে।
