নগাঁও জিলাৰ চামগুৰি আৰক্ষী থানাৰ অন্তৰ্গত পুৰণিগুদামৰ কেঞাপট্টীত দেওবাৰে সন্ধিয়া প্ৰায় সাত মান বজাত সৃষ্টি হয় এক উত্তপ্ত পৰিস্থিতিৰ।
এ এছ ০২ চিচি ১৮৯৩ নম্বৰৰ এখন দুৰ্ঘটনাগ্ৰস্ত গৰু ভৰ্তি টাটা ম’বাইল ট্ৰাক উদ্ধাৰক কেন্দ্ৰ কৰি ঠাই খনত উত্তপ্ত পৰিস্থিতি সৃষ্টি হয়।
দুৰ্ঘটনাগ্ৰস্ত টাটা ম’বাইল ট্ৰাকখনত এঘাৰটাকৈ গৰু উদ্ধাৰ হোৱাক কেন্দ্ৰ কৰি ৰাইজৰ মাজত সন্দেহ ঘনীভূত হয়।
স্থানীয় ৰাইজে গৰু চোৰৰ সন্দেহত খেদি-খেদি এজন যুৱকক কৰায়ত্ত কৰাৰ বিপৰীতে দুৰ্ঘটনাগ্ৰস্ত টাটা ম’বাইল ট্ৰাকখনৰ পলায়ন কৰিব খোজা চালক জনক পুৰণিগুদাম আৰক্ষীয়ে ঘটনাস্থলীৰ পৰা আটক কৰে।
উজনি অসমৰ পৰা নামনি অসম অভিমুখী টাটা ম’বাইল খনে ৰাষ্ট্ৰীয় ঘাইপথৰ ওপৰত কে’বাখনো বাহন খুন্দিয়াই আহিছিল বুলি একাংশ প্ৰত্যক্ষদৰ্শীয়ে ৰাইজৰ আগত প্ৰকাশ কৰিছিল।
উল্লেখ্য যে, কেইবাখনো আৰক্ষী থানাৰ লগতে ৩৭ নং ৰাষ্ট্ৰীয় ঘাই পথৰ দাঁতিতে থকা চামগুৰিৰ দৰে এখন বৃহৎ আৰক্ষী থানা থকাৰ পাছতো চামগুৰি আৰক্ষী থানাৰ সন্মুখেৰে কিদৰে প্ৰতিদিনেই এনে ধৰণৰ সন্দেহজনক গৰু ভৰ্তি ট্ৰাক পাৰ হৈ যায় তাকে লৈ আৰক্ষীৰ ওপৰত স্থানীয় ৰাইজে সন্দেহ প্ৰকাশ কৰি চৰম অসন্তুষ্টি ব্যক্ত কৰা দেখা গৈছে।
আৰক্ষীৰ বিৰুদ্ধে চূড়ান্ত নিৰ্লিপ্ততাৰ অভিযোগ উত্থাপন কৰি স্থানীয় একাংশ ৰাইজে সমগ্ৰ বিষয়টোৰ উচিত তদন্তৰ পাছতহে প্ৰকৃত ৰহস্য পোহৰলৈ আহিব বুলি আশা কৰিছে।
