ৰংজুলিত একাংশ অসাধু চক্ৰৰ দ্বাৰা বন ধ্বংসযজ্ঞ আৰু চোৰাং কাঠৰ ব্যৱসায় অব্যাহত আছে ৷ বনাঞ্চলৰ মূল্যৱান গছ কাটি একাংশই চলাই গৈছে ৰমৰমীয়া ব্যৱসায় ৷ সময়ে সময়ে বন বিভাগৰ নিস্ক্ৰিয়তাৰ সুযোগ লৈ একাংশই ৰংজুলি বনাঞ্চলিক কাৰ্যালয়ৰ অন্তৰ্গত বিভিন্ন বনাঞ্চলৰ পৰা মূল্যৱান শাল গছ কাটি সৰবৰাহ কৰি ব্যৱসায় চলাই আহিছে ৷
তাৰ মাজতে ৰাইজৰ সক্ৰিয়তাত ৰংজুলিত জব্দ কৰা হৈছে মূল্যৱান শাল গছৰ কুণ্ডা ৷ যোৱা নিশা ৰংজুলিৰ নিকটৱৰ্তী “পাটপাৰা ইংলিছ বজাৰ” গাঁৱৰ পৰা ৰাইজে বুজন পৰিমাণৰ শাল গছৰ কুণ্ডা জব্দ কৰিবলৈ সক্ষম হয় ৷
বন সংৰক্ষণৰ দায়িত্বত থকা ৰাইজৰ সদস্যই গাঁওখনৰ পৰা গছৰ কুণ্ডাসমুহ জব্দ কৰি বন বিভাগক খবৰ দিয়ে ৷ সেইদৰে, বন বিভাগৰ লোক উপস্থিত হৈ এগৰাকী ব্যক্তিৰ ঘৰৰ পৰা জব্দ কৰা গছৰ কুণ্ডা সমুহ ৰংজুলি বনাঞ্চলিক কাৰ্যালয়লৈ লৈ আনে৷
লগতে পঢ়ক: ভুৱা বাতৰি প্ৰচাৰ! ১৬টা জনপ্ৰিয় ইউটিউব চেনেল নিষিদ্ধ কৰিলে মোদী চৰকাৰে; চাওক তালিকা
জব্দকৃত গছৰ কুণ্ডাখিনিৰ আনুমানিক বজাৰ মূল্য ৭০ লক্ষাধিক টকাৰ হ’ব বুলি জনাইছে বন বিভাগে ৷
অৱশ্যে বৰ্তমানলৈকে চোৰাং ব্যৱসায়ত জড়িত কোনো লোকক কৰায়ত্ত কৰিবলৈ সক্ষম হোৱা নাই বন বিভাগ৷
এনেদৰে প্ৰায়ে বনাঞ্চলৰ গছ কাটি একাংশই ব্যৱসায় চলাই যোৱাত প্ৰকৃতিপ্ৰেমী ৰাইজ চিন্তিত হৈ পৰিছে ৷
