লকডাউন: অসমত ১২৭২টা উলংঘনৰ ঘটনা, ৮৫৩৩খন বাহন জব্দ
অসমত শুকুৰবাৰলৈকে ১২৭২টা লকডাউন উলংঘনৰ ঘটনা সংঘটিত হৈছে আৰু ১৩৫৯জন লোকক গ্ৰেপ্তাৰ কৰা হৈছে।
লকডাউনৰ সময়চোৱাত দৰং জিলাত এটা আইন-শৃংখলাজনিত ঘটনা সংঘটিত হৈছে।
লকডাউনৰ সময়চোৱাত মুঠ ৮৫৩৩খন যান-বাহন জব্দ কৰা হৈছে। ইয়াৰ ভিতৰত আছে দুচকীয়া ৭৮১৬, তিনিচকীয়া ৭৭, চাৰিচকীয়া ৬৩২, ট্ৰাক পাঁচ, ট্ৰেক্তৰ দুই আৰু ট্ৰেইলাৰ এখন।
এই সময়চোৱাত ১২খন দেশী নাও আৰু পাঁচখন মেচিন নাঁৱো জব্দ কৰা হৈছে।
লকডাউনৰ সময়চোৱাত মুঠ ৬৬৪টা গোচৰ ৰুজু হৈছে। জৰিমনা আদায় কৰা হৈছে ২৯,৪২,৩০০ টকা।
আনহাতে এই সময়চোৱাত ক’ভিড-১৯ সন্দৰ্ভত চ’চিয়েল মিডিয়াত ভুৱা বাতৰি বিয়পোৱাৰ বাবে ৬০টা গোচৰ ৰুজু কৰা হৈছে।
এই সন্দৰ্ভত ৩৬জন লোকক গ্ৰেপ্তাৰ কৰা হৈছে। তাৰে নজনক পিছত মুকলি কৰি দিয়া হৈছে।
লকডাউনৰ সময়চোৱাত ৰাজ্যৰ ১৪টা স্থানক কণ্টেইনমেণ্ট এৰিয়া হিচাপে ঘোষণা কৰা হৈছে।
মৰিগাঁৱৰ তিনিটা, ধুবুৰী আৰু গোৱালপাৰাৰ দুটা আৰু নলবাৰী, কামৰূপ মহানগৰ, কামৰূপ, দক্ষিণ শালমাৰা, লখিমপুৰ, কাছাৰ আৰু হাইলাকান্দিৰ এটাকৈ অঞ্চলক কণ্টেইনমেণ্ট এৰিয়াৰূপে ঘোষণা কৰা হৈছে।