লকডাউন: সামাজিক ব্যৱধান মানি কৃষি কৰ্মত জৰিত হ’বলৈ আহ্বান মন্ত্ৰী অতুল বৰাৰ
লকডাউনৰ সময়চোৱাত সামাজিক ব্যৱধান মানি চলি কৃষকক কৃষি কৰ্মত জৰিত হ’বলৈ আহ্বান জনাইছে কৃষি মন্ত্ৰী অতুল বৰাই।
মঙ্গলবাৰে দিচপুৰৰ চৰকাৰী আৱাসত এক সংবাদমেল সম্বোধন কৰি অসমৰ কৃষক ৰাইজলৈ এই আহ্বান জনাইছে মন্ত্ৰীগৰাকীয়ে।
“এই সময়চোৱাত অসমৰ কৃষকসকলে সামাজিক ব্যৱধান বৰ্তাই ৰাখি কৃষি কৰ্মত জড়িত হোৱাৰ বাবে আহ্বান জনাইছো। কৃষিৰ ক্ষেত্ৰত লকডাউন অলপ শিথিল হ‘ব,” সংবাদমেলত বৰাই এইদৰে কয়।
ইপিনে, ৰাজ্যৰ ধেমাজিকে ধৰি অন্য দুই এঠাইত খেতিত পোকৰ আক্ৰমণ হৈছে বুলি উল্লেখ কৰি মন্ত্ৰীগৰাকীয়ে কয় “সংশ্লিষ্ট জিলা বিষয়াক ইতিমধ্যে ব্যৱস্থা গ্ৰহণৰ বাবে নিৰ্দেশ দিয়া হৈছে।”
বৰাই কয় “কৃষি বা অৰ্থনৈতিকভাৱে বাৰুকৈয়ে বিধ্বস্ত হ’লেও স্বাস্থ্যক অগ্ৰাধিকাৰ দিব লাগে। জীৱনৰ সুৰক্ষাত গুৰুত্ব দিয়াটো প্ৰথম দায়িত্ব।‘
ইপিনে, খানাপাৰাত পশুপালকৰ বাবে নিয়ন্ত্ৰণ কক্ষ হ’ব বুলি ঘোষণা কৰি মন্ত্ৰীগৰাকীয়ে কয় “পশুখাদ্যৰ অভাৱ নহয়। বাহিৰৰ পৰা অনাৰ ব্যৱস্থা কৰা হৈছে।”
তদুপৰি, হোম কুৱাৰেণ্টাইনত থকাসকলক খেতিপথাৰলৈ নাহিবলৈ আহ্বান জনোৱাৰ লগতে তেওঁলোকৰ পৰিয়ালৰ লোককো কৃষিকাৰ্য্যৰ পৰা বিৰত থাকিবলৈ মন্ত্ৰীগৰাকীয়ে সংবাদমেলত আহ্বান জনায়।
আনহাতে, খেতিয়কসকলে তেওঁলোকৰ অসুবিধাসমূহৰ বাবে স্থানীয় প্ৰশাসনক যোগাযোগ কৰিবলৈ মন্ত্ৰীগৰাকীয়ে আহ্বান জনায়।
কৃষক ৰাইজক উদ্দেশ্যি তেওঁ সংবাদমেলত কয়, “উৎপাদিত সামগ্ৰীসমূহ বিক্ৰী কৰিবলৈ জিলা কৃষি বিষয়াক যোগাযোগ কৰক,অনুমোদিত বাহনেৰে বিক্ৰী কৰা হ’ব পাচলিসমূহ।”
ইয়াৰোপৰি, প্ৰতিগৰাকী কৃষকৰ বেংক একাউন্টত ৰাজ্য চৰকাৰে ২৫০০ টকাকৈ সুমুৱাই দিব বুলি মন্ত্ৰীগৰাকীয়ে কয়।