ৰাজ্যত আজি ল’কডাউনৰ অষ্টম দিন। ধাৰাবাহিক বন্ধৰ ফলত দিন হাজিৰা কৰা তথা যেনে তেনে পেটে-ভাতে খাই থকাসকল এতিয়া তীব্ৰ সংকটত পৰা পৰিলক্ষিত হৈছে।
বিভিন্ন দল-সংগঠন তথা সুহৃদয়বান ব্যক্তি বিশেষে বিগত সময়ত সেই পৰিয়ালসমূহক সাধ্য অনুসৰি খাদ্য সামগ্ৰী যোগান ধৰি সহায় কৰি অহাৰ সমান্তৰালকৈ আজি যোৰহাট জিলা প্ৰশাসনেও টীয়ক পৌৰসভাৰ এলেকাৰ আৰ্তসকলক চাউল, দাইল, মিঠাতেল, নিমখ আদি ঘৰে ঘৰে গৈ অঞ্চলৰ গাঁওবুঢ়াৰ সহায়ত বিতৰণ কৰে।
প্ৰশাসনৰ হৈ টীয়ক ৰাজহ চক্ৰ বিষয়া আকাশী দুৱৰাৰ পৰ্যবেক্ষণত পৰিচালিত উক্ত কাৰ্যসূচীত টীয়ক ৰাজহ চক্ৰৰ (সংলগ্ন) চক্ৰ বিষয়া জয় প্ৰকাশ মহন্ত, পৌৰসভাৰ ২নং ৱাৰ্ডৰ ৱাৰ্ড আয়ুক্ত অভিজিৎ বৰুৱা, ৪ নং ৱাৰ্ডৰ আয়ুক্ত মাধৱী হাজৰিকাই সহযোগিতা আগবঢ়ায়।
আনহাতে প্ৰশাসন আৰু টীয়ক পৌৰসভাৰ পৌৰপতি ৰফিক উজ জামানৰ সহযোগত টীয়কৰ অগ্নি নিৰ্বাপক বাহিনীৰ দ্বাৰা টীয়কৰ নগৰ এলেকাৰ বিভিন্ন জনবহুল স্থানত আজি পুনৰ ছেনিটাইজেশ্যনৰ ব্যৱস্থা কৰা হয়।
টীয়ক পৌৰসভা এলেকাৰ অন্তৰ্গত অফিচ কাছাৰী, মন্দিৰ, গিৰ্জা, নামঘৰ, মছজিদকে ধৰি এটিম, ফাৰ্মেচী সকলো স্থান পুনৰ ছেনিটাইজেশ্যন কৰি পৰিৱেশ সুস্থ কৰিবলৈ চেষ্টা অব্যাহত ৰখা দেখা যায়।
