অসমীয়াৰ প্ৰতিবাদক উপেক্ষা কৰি লোকসভাত গৃহীত নাগৰিকত্ব সংশোধনী বিধেয়ক

অসমবাসীৰ তীব্ৰ প্ৰতিবাদ তথা বিৰোধিতাক উপেক্ষা কৰি সোমবাৰে মাজনিশা নাগৰিকত্ব সংশোধনী বিধেয়ক ২০১৯’ লোকসভাত গৃহীত হ’ল।

বিধেয়কখনৰ সপক্ষে ৩১১টা ভোট পৰাৰ বিপৰীতে বিপক্ষে ৮০টা ভোট পৰে।

লোকসভাত বিধেয়কখন উত্থাপন হোৱাৰ সময়ত বিৰোধীয়ে হুলস্থুল লগোৱাৰ লগতে কেন্দ্ৰীয় চৰকাৰৰ ওচৰত বিভিন্ন প্ৰশ্ন ৰাখে।

গৃহ মন্ত্ৰী অমিত শ্বাহে সদনত বিৰোধীৰ সমালোচনা তথা প্ৰশ্নৰ উত্তৰ দিয়ে। বিধেয়কখন গৃহীত হোৱাৰ পাছতে প্ৰধান মন্ত্ৰী নৰেন্দ্ৰ মোদীয়ে গৃহ মন্ত্ৰী অমিত শ্বাহক প্ৰশংসা কৰে। বিধেয়কখন বুধবাৰে ৰাজ্যসভাতউত্থাপন কৰা হ’ব।

নাগৰিকত্ব সংশোধনী বিধেয়কখনৰ সন্দৰ্ভত হোৱা বিতৰ্কৰ মাজত অমিত শ্বাহে কংগ্ৰেছৰ বিৰুদ্ধে আক্ৰমণাত্মক হৈ পৰে।

তেওঁ কয় যে যদি কংগ্ৰেছে দেশৰ বিভাজন নকৰিলেহেঁতেন তেতিয়াহ’লে এই বিধেয়কখন আনিবলগীয়া নহ’লহেঁতেন। লোকসভাত শ্বাহে কয় যে দেশত বিভ্ৰান্তিৰ সৃষ্টি হোৱাটো আমি নিবিচাৰো।

শ্বাহে কয় যে কোনোধৰণে বিধেয়কখন সংবিধান বিৰোধী নহয়। নাইবা ই অনুচ্ছেদ ১৪ৰ উলংঘাও কৰা নাই। ধৰ্মৰ আধাৰতে দেশ বিভাজন হৈছিল, সেয়া নোহোৱা হ’লে ভাল আছিল। ইয়াৰ বাবেই এই বিধেয়কখন অনাটো জৰুৰী হৈ পৰিছিল।

অমিত শ্বাহে লগতে কয় যে ১৯৪৭ চনত পাকিস্তানত ২৩ শতাংশ হিন্দু আছিল যিটো ২০১১চনত মাত্ৰ ৩.৪শতাংশ হৈছে।

‘’চুবুৰীয়া দেশত সংখ্যালঘুৰ ওপৰত হোৱা নিৰ্যাতনলৈ লক্ষ্য ৰাখি ভাৰত নিৰৱ দৰ্শক হৈ থাকিব নোৱাৰে। ইপিনে সংখ্যালঘুৰ সংখ্যা বৃদ্ধি পাইছে। ইয়াত হিন্দুৰ জনসংখ্যাৰ হাৰ হ্ৰাস পোৱাৰ বিপৰীতে মুছলমানৰ জনসংখ্যাৰ হাৰ বৃদ্ধি পাইছে। চুবুৰীয়া দেশত সংখ্যালঘুৰ ওপৰত হোৱা অত্যাচাৰত ভাৰত নিৰৱে থাকিব নোৱাৰে,’’-শ্বাহে কয়।

ইপিনে, নাগৰিকত্ব সংশোধনী বিধেয়কৰ বিৰুদ্ধে অসম তথা উত্তৰ-পূৰ্বাঞ্চলত প্ৰতিবাদ অব্যাহত আছে।

মঙলবাৰে আছু তথা উত্তৰ-পূব ছাত্ৰ সন্থাই ১১ঘন্টীয়া বন্ধৰ আহ্বান দিছে। লোকসভাত বিধেয়কখন গৃহীত হোৱাৰ পাছত এইবাৰ ৰাজ্যসভাত বিধেয়কখন গৃহীত কৰাৰ বাবে বিজেপি চৰকাৰে যৎপৰোনাস্তি চেষ্টা চলাব।