কৰ’নাত আক্ৰান্ত হৈ লোকপাল সদস্য ন্যায়াধীশ অজয় ত্ৰিপাঠীৰ মৃত্যু

কৰ’না ভাইৰাছৰ দ্বাৰা আক্ৰান্ত হৈ লোকপালৰ ন্যায়িক সদস্য ন্যায়াধীশ অজয় ত্ৰিপাঠীৰ মৃত্যু হৈছে।

যোৱা এপ্ৰিল মাহত কৰ’নাত আক্ৰান্ত হোৱাৰ পাছত ৬২ বছৰীয়া ন্যায়াধীশ অজয় ত্ৰিপাঠী দিল্লীৰ এইমছত চিকিৎসাধীন হৈ আছিল।

শনিবাৰে নিশা ৯বজাত হৃদযন্ত্ৰৰ ক্ৰিয়া বন্ধ হৈ তেওঁ শেষ নিশ্বাস ত্যাগ কৰে।

এইমছৰ সূত্ৰই জানিবলৈ দিয়া মতে বেমাৰৰ ফলত ন্যায়াধীশ অজয় ত্ৰিপাঠী অত্যন্ত দুৰ্বল হৈ পৰিছিল। স্বাস্থ্যৰ অৱনতি ঘটাৰ পাছত তেওঁক আইচিয়ুত ভৰ্তি কৰোৱা হৈছিল। যোৱা তিনিদিন ধৰি তেওঁক ভেন্টিলেটৰত ৰখা হৈছিল।

কেন্দ্ৰীয় মন্ত্ৰী ৰবিশংকৰ প্ৰসাদে টুইটাৰৰ জৰিয়তে ন্যায়াধীশ অজয় ত্ৰিপাঠীৰ মৃত্যুত শোক প্ৰকাশ কৰিছে। তেওঁ কয় যে ন্যায়াধীশ অজয় ত্ৰিপাঠীৰ মৃত্যুত তেওঁ অত্যন্ত ব্যথিত হৈছে।

ৰবিশংকৰ প্ৰসাদে কয় যে তেওঁ পাটনাত এসময়ত ন্যায়াধীশ অজয় ত্ৰিপাঠীৰ সৈতে একেলগে ওকালতি কৰিছিল।

ন্যায়াধীশ অজয় ত্ৰিপাঠীৰ মৃত্যুত বিহাৰৰ মুখ্য মন্ত্ৰী নীতিশ কুমাৰ আৰু উপ মুখ্য মন্ত্ৰী সুশীল মোদীয়েও শোক প্ৰকাশ কৰিছে।

ন্যায়াধীশ অজয় ত্ৰিপাঠী ছত্তীশগড় উচ্চ ন্যায়ালয়ৰ মুখ্য ন্যায়াধীশো আছিল।তাৰ পূৰ্বে  তেওঁ পাটনা উচ্চ ন্যায়ালয়ৰ ন্যায়াধীশ আছিল।

শেহতীয়াকৈ তেওঁ লোকপালৰ চাৰিগৰাকী ন্যায়িক সদস্যৰ মাজৰ এগৰাকী সদস্য হিচাপে কাৰ্যনিৰ্বাহ কৰিছিল।