দীৰ্ঘ সময়ৰ কামে সলনি কৰিব পাৰে মগজুৰ গঠন: নতুন অধ্যয়ন

দীৰ্ঘ সময় ধৰি কাম কৰিলে মগজুৰ গঠনত পৰিৱৰ্তন ঘটাৰ সম্ভাৱনা থাকে বুলি দক্ষিণ কোৰিয়াৰ চুং-আং আৰু য়নছেই বিশ্ববিদ্যালয়ৰ বিজ্ঞানীৰ দ্বাৰা কৰা এক নতুন গৱেষণাত প্ৰকাশ পাইছে। ‘অকুপেচনেল এণ্ড এনভাইৰনমেণ্টেল মেডিচিন’ নামৰ আলোচনীত প্ৰকাশিত এই গৱেষণাৰ মতে, সপ্তাহত ৫২ ঘণ্টা বা তাতকৈ অধিক কাম কৰা স্বাস্থ্যকৰ্মীৰ মগজুৰ নিৰ্দিষ্ট অঞ্চলত উল্লেখযোগ্য পৰিৱৰ্তন দেখা গৈছে। গৱেষণাত ১১০ জন শ্ৰমিকক বিশ্লেষণৰ বাবে অন্তৰ্ভুক্ত কৰা হৈছিল, য’ত ৩২ জনে অত্যধিক সময় আৰু ৭৮ জনে মানক সময় কাম কৰিছিল। এম আৰ আই স্কেনৰ জৰিয়তে মগজুৰ ধূসৰ পদাৰ্থৰ মাত্ৰাৰ পাৰ্থক্য চিনাক্ত কৰা হৈছে।

গৱেষণাৰ তথ্য অনুসৰি, অতিৰিক্ত কামে সমস্যা সমাধান, স্মৃতিশক্তি আৰু আৱেগিক নিয়ন্ত্ৰণৰ সৈতে জড়িত মগজুৰ অংশত প্ৰভাৱ পেলায়, যাৰ ফলত মানসিক স্বাস্থ্যৰ ওপৰতো নেতিবাচক প্ৰভাৱ পৰে। গৱেষকসকলে কয় যে এই পৰিৱৰ্তনে অত্যধিক কামৰ বোজাৰ সৈতে জ্ঞানমূলক আৰু আৱেগিক সমস্যাৰ জৈৱিক ভিত্তিৰ সম্পৰ্ক প্ৰকাশ কৰে। তেওঁলোকে জোৰ দি কৈছে যে অত্যধিক কৰ্মৰ সময় হ্ৰাস কৰাৰ বাবে কৰ্মক্ষেত্ৰত নীতি প্ৰণয়নৰ প্ৰয়োজনীয়তা অতি জৰুৰী।

ইনষ্টিটিউচন অৱ অকুপেচনেল ছেফটি এণ্ড হেলথৰ নীতি বিভাগৰ মুৰব্বী ৰুথ উইলকিনছনে কয় যে দীৰ্ঘ সময়ৰ কামৰ “মহামাৰী” মোকাবিলাৰ বাবে জৰুৰী ব্যৱস্থাৰ প্ৰয়োজন। তেওঁৰ মতে, আজিৰ ডিজিটেল যুগত শ্ৰমিকৰ পৰা সদায় উপলব্ধ থকাৰ আশা কৰা হয়, যিয়ে কামৰ সময়ৰ বাহিৰত বিশ্ৰামৰ অধিকাৰ কাঢ়ি লৈছে। এই গৱেষণাই বৃত্তিগত স্বাস্থ্যৰ প্ৰতি সজাগতা বৃদ্ধিৰ লগতে কৰ্মক্ষেত্ৰৰ সুস্থ নীতিৰ গুৰুত্বৰ ওপৰত আলোকপাত কৰিছে।