নতুন বছৰ আহি আছে। কিন্তু, যোৱা এটা বছৰত যি হৈছে, আমি তাৰ হিচাপ ৰাখিব লাগিব। কোনজন ব্যক্তি, ঘটনা বা খবৰ ভাৰতৰ সবাটোকৈ চৰ্চিত বিষয় আছিল ? লোকসভা নিৰ্বাচনৰ পৰা আৰম্ভ কৰি অনন্ত আম্বানীৰ বিয়ালৈকে, ৰাম মন্দিৰ উদ্বোধনীৰ পৰা আৰম্ভ কৰি চন্দ্ৰযানৰ সফলতালৈকে…থোৰতে সকলো ঘটনাৰ ওপৰত চকু ফুৰাও আহক-
১. লোকসভা নিৰ্বাচন ২০২৪
২০২৪ চনৰ লোকসভা নিৰ্বাচনত প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰতীয় জনতা পাৰ্টিয়ে তৃতীয়বাৰৰ বাবে চৰকাৰ গঠন কৰে। কিন্তু পূৰ্বতকৈ অলপ কম আসন পোৱাৰ বাবে মিত্ৰশক্তিৰ ওপৰত বিজেপিৰ নিৰ্ভৰশীলতা বাঢ়িছে। এই নিৰ্বাচন দেশৰ ৰাজনৈতিক ব্যৱস্থাত এক অতি গুৰুত্বপূৰ্ণ পৰিঘটনা আছিল।
২. ৰাম মন্দিৰ উদ্বোধন
অযোধ্যাৰ বহু প্ৰত্যাশিত আৰু ঐতিহাসিক ৰাম মন্দিৰ ২০২৪ চনতেই উদ্বোধন কৰা হয়। বহু বছৰ অপেক্ষাৰ আৰু বহু জটিলতাৰ অন্তত উত্তৰ প্ৰদেশৰ অযোধ্যাত ভাৰতীয় হিন্দু সমাজৰ বাবে ৰামলালাৰ প্ৰতিমূৰ্তি প্ৰতিষ্ঠা কৰা হয়।
৩. অনন্ত আম্বানীৰ বিয়া
ৰিলায়েন্স গ্ৰুপৰ মুৰব্বী মুকেশ আম্বানীৰ কনিষ্ঠ পুত্ৰ অনন্ত আম্বানীৰ বিয়া ২০২৪ চনৰ অন্যতম চৰ্চিত সামাজিক অনুষ্ঠান। কাৰণ এইখন কোনো সাধাৰণ বিয়া নাছিল। এই বিয়া উপলক্ষে সমগ্ৰ মুম্বাই চহৰৰ ছবিয়ে সলনি হয়। ৰিহানাৰ পৰা আৰম্ভ কৰি প্ৰধানমন্ত্ৰীলৈকে দেশ-বিদেশৰ চেলিব্ৰিটি আৰু তাৰকাসকলে এই অনুষ্ঠানত অংশগ্ৰহণ কৰে।
৪. চন্দ্ৰযান-৩ৰ সফল উৎক্ষেপণ
ইছৰোৱে ২০২৪ চনত চন্দ্ৰযান-৩ উৎক্ষেপণ কৰি নতুন মাইলৰ খুঁটিত উপনীত হৈছে। পূৰ্বৰ চন্দ্ৰ অভিযান বিফল হোৱাৰ পাছত এইবাৰৰ এই প্ৰচেষ্টাক লৈ মানুহৰ উন্মাদনা তুংগত উঠিছিল। চন্দ্ৰৰ অন্ধকাৰ অঞ্চল অধ্যয়নৰ বাবে ইছৰো-ই এই অভিযান চলাইছিল। এই ঘটনাই ভাৰতৰ মহাকাশ গৱেষণাক বিশ্বৰ এক অনন্য উচ্চতালৈ লৈ গৈছে।
৫. জম্মু-কাশ্মীৰত বিধানসভা নিৰ্বাচন আৰু সেনা-উগ্ৰপন্থীৰ সংঘৰ্ষ
৩৭০ অনুচ্ছেদ বাতিল হোৱাৰ পাছত ২০২৪ চনত প্ৰথমবাৰৰ বাবে জম্মু-কাশ্মীৰত বিধানসভা নিৰ্বাচন অনুষ্ঠিত হয়। জম্মু-কাশ্মীৰত যেতিয়া ৰাজ্য আছিল, তেতিয়া শেষবাৰৰ বাবে ২০১৪ চনত ভোটদান হৈছিল। ২০১৯ চনত বিশেষ সাংবিধানিক সুৰক্ষা প্ৰত্যাহাৰ কৰাৰ পাছত তাত আৰু বিধানসভা নিৰ্বাচন হোৱা নাছিল। ফাৰুক আব্দুল্লাৰ দল নেচনেল কনফাৰেন্স আৰু কংগ্ৰেছৰ মিত্ৰতাই এই নিৰ্বাচনত জয়লাভ কৰে।২০২৪ চনলৈকে জম্মু-কাশ্মীৰত ১১৯ জন সক্ৰিয় সন্ত্ৰাসবাদী আছে বুলি ৰাষ্ট্ৰীয় সংবাদ মাধ্যমত প্ৰকাশ পাইছে। এই বছৰ সন্ত্ৰাসবাদ সম্পৰ্কীয় ২৫টা কাণ্ড সংঘটিত হোৱাৰ ফলত ২৪ জন নিৰাপত্তাৰক্ষীৰ মৃত্যু হৈছে, যিটো ২০২৩ চনৰ সংখ্যাৰ ওচৰ চাপিছে। কিন্তু ২০২৪ চনত নিৰাপত্তা বাহিনীয়ে ২১ জন পাকিস্তানী নাগৰিককে ধৰি ৬১ জন সন্ত্ৰাসবাদীক নিষ্ক্ৰিয় কৰিছে।
৬. আন্তঃৰাষ্ট্ৰীয় ক্ৰিকেটৰ পৰা বিৰাট কোহলীৰ অৱসৰ
ভাৰতৰ জনপ্ৰিয় ক্ৰিকেটাৰ বিৰাট কোহলীয়ে ২০২৪ চনত আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰিছে। তেওঁৰ অৱসৰৰ খবৰে ক্ৰিকেট প্ৰেমীসকলৰ মাজত এক আৱেগিক মুহূৰ্তৰ সৃষ্টি কৰাৰ লগতে ভাৰতীয় ক্ৰিকেট ইতিহাসৰ এটা যুগৰ অন্ত পৰিল।
৭. অলিম্পিকত ভাৰতৰ ডাঙৰ সফলতা আৰু ভিনেশ ফোগাট
২০২৪ চনৰ পেৰিছ অলিম্পিকত ভাৰতে মুঠ ৬টা পদক লাভ কৰিছিল। তাৰ ভিতৰত এটা ৰূপৰ পদক আৰু বাকীবোৰ ব্ৰঞ্জৰ পদক। শ্বুটিঙত ভাৰতৰ মনু ভাকৰে এযোৰ ব্ৰঞ্জৰ পদক লাভ কৰে। সৰবজিৎ সিঙে এটা ব্ৰঞ্জৰ পদক জয়লাভ কৰে। শ্বুটিঙত আন এক ব্ৰঞ্জৰ পদক লাভ কৰে স্বপ্নীল কুশলে। আনহাতে, টকিঅ’ অলিম্পিকৰ পাছত ভাৰতীয় হকী দলটোৱেও পেৰিছত ব্ৰঞ্জৰ পদক লাভ কৰে। ভাৰতীয় খেলুৱৈ নীৰজ চোপ্ৰাই জেভলিন নিক্ষেপত ৰূপৰ পদক লাভ কৰে। আৰু অৱশেষত মল্লযুঁজত ব্ৰঞ্জৰ পদক অৰ্জন কৰে অমন শ্বেৰাৱটে। এই অলিম্পিকতে আমেৰিকাৰ চাৰা হিল্ডেব্ৰাণ্ডৰ বিৰুদ্ধে সোণৰ পদক লাভ কৰাৰ পূৰ্বে অতিৰিক্ত ওজন পোৱাৰ পাছত মহিলাৰ ৫০ কেজি শাখাৰ পৰা অযোগ্য ঘোষণা কৰা হয় ভিনেশ ফোগাটক তাৰ পাছতে ভিনেশে অৱসৰ ঘোষণা কৰে।তেঁও ২০২৪ চনৰ বিধানসভা নিৰ্বাচনত ভাৰতীয় জাতীয় কংগ্ৰেছক প্ৰতিনিধিত্ব কৰি জুলানা সমষ্টিৰ পৰা জয়ী হয়।
৮. অসমৰ ভয়াৱহ বানপানী
২০২৪ চনৰ বাৰিষাৰ সময়ত অসমত ভয়াৱহ বান পৰিস্থিতিৰ সৃষ্টি হৈছিল। বিপদ ৰেখাৰ ওপৰেৰে বৈ যোৱা ব্ৰহ্মপুত্ৰ নদীয়ে বহু অঞ্চল প্লাৱিত কৰে। লক্ষাধিক লোক স্থানচ্যুত হয়। চৰকাৰ হিচাপত প্ৰায় ১০০ জন লোকৰ মৃত্যু হয়। যদিও নিবিড় উদ্ধাৰ অভিযান আৰু চৰকাৰী সাহায্যৰ পিছত পৰিস্থিতি কিছু পৰিমাণে পুনৰুদ্ধাৰ হয়, তথাপিও বানপানীয়ে কৃষি, যোগাযোগ ব্যৱস্থা আৰু জনজীৱনত যথেষ্ট প্ৰভাৱ পেলায়।
৯. মণিপুৰত সাম্প্ৰদায়িক হিংসা
২০২৪ চনত মণিপুৰত জাতিগত সংঘাত আৰু হিংসাৰ ঘটনাই সমগ্ৰ দেশতে আলোড়নৰ সৃষ্টি কৰিছিল। কুকি আৰু মেইটেই সম্প্ৰদায়ৰ মাজত দীৰ্ঘদিনীয়া উত্তেজনাই নতুন, ভয়ানক ৰূপ লৈছে। এই সংঘাতত বহু লোকৰ প্ৰাণ কাঢ়ি নিয়াৰ লগতে হাজাৰ হাজাৰ লোক গৃহহীন হৈ পৰে। পৰিস্থিতি নিয়ন্ত্ৰণ কৰিবলৈ কেন্দ্ৰ আৰু ৰাজ্য চৰকাৰে কঠোৰ ব্যৱস্থা গ্ৰহণ কৰিব লাগিব।
১০. দিল্লীত ভয়ংকৰ বায়ু প্ৰদূষণ
২০২৪ চনৰ শেষৰ ফালে দিল্লীৰ বায়ু প্ৰদূষণে শীতকালত অভিলেখ সৃষ্টি কৰিছিল। বায়ুৰ গুণাগুণ অৰ্থাৎ এ কে আই অত্যন্ত বিপজ্জনক মাত্ৰাত উপনীত হোৱাৰ বাবে বিদ্যালয় আৰু মহাবিদ্যালয় বন্ধ কৰা হৈছিল।
