কেন্দ্ৰীয় শক্তি মন্ত্ৰী শ্ৰীপদ নায়কে সংসদত দেশৰ ৪৬টা বৃহৎ নদীবান্ধৰ ভিতৰত গেৰুকামুখৰ নামনি সোৱণশিৰি জলবিদ্যুৎ প্ৰকল্পক বিপজ্জনক আৰু স্পৰ্শকাতৰ বুলি ঘোষণা কৰাৰ পিছতে আম আদমি পাৰ্টী (আপ), অসমৰ ৰাজ্যিক সাংগঠনিক সাধাৰণ সম্পাদক ৰাজীব শইকীয়াই এই বিষয়ত তীব্ৰ প্ৰতিক্ৰিয়া প্ৰকাশ কৰিছে। তেওঁৰ মতে, এই প্ৰকল্পৰ বিপদৰ বিষয়ে জানিও কেন্দ্ৰীয় চৰকাৰে এন এইচ পি চিৰ নিৰ্মাণৰ অনুমতি প্ৰদান কৰিছিল, যিটো ৰাইজৰ সুৰক্ষাৰ প্ৰতি উদাসীনতাৰ পৰিচায়ক।
ৰাজীব শইকীয়াই এক প্ৰেছ বিবৃতিত কয়, “বিশেষজ্ঞ কমিটীৰ পৰামৰ্শক উপেক্ষা কৰি গেৰুকামুখৰ বৃহৎ নদীবান্ধৰ নিৰ্মাণ কৰাৰ ফলত আজি এন এইচ পি চি আৰু কেন্দ্ৰীয় চৰকাৰে এই প্ৰকল্প মুকলিৰ ক্ষেত্ৰত বাৰম্বাৰ চিন্তা কৰিবলগীয়া হৈছে।” তেওঁ প্ৰশ্ন কৰিছে যে, যদি এই প্ৰকল্প বিপজ্জনক বুলি জানিও কিয় নিৰ্মাণৰ অনুমতি দিয়া হৈছিল? আাৰু মানুহৰ জীৱনৰ প্ৰতি চৰকাৰৰ দায়িত্ব ক’ত? তেওঁ আৰু কয়, “মানুহৰ মৃত্যুৰ পিছতো চৰকাৰে এই নদীবান্ধ বিপজ্জনক বুলি কৈ দায়িত্ব সামৰিব নেকি?”
আপৰ নেতাজনে দাবী কৰিছে যে কেন্দ্ৰীয় আৰু ৰাজ্য চৰকাৰে ৰাইজৰ সুৰক্ষাৰ প্ৰতি গুৰুত্ব নিদি এই প্ৰকল্পৰ নিৰ্মাণ অব্যাহত ৰাখিছে। তেওঁ প্ৰশ্ন কৰিছে যে গেৰুকামুখৰ প্ৰকল্প বিপজ্জনক বুলি জানি চৰকাৰে বিকল্প ব্যৱস্থা কিয় গ্ৰহণ কৰা নাই। তেওঁ বিশেষজ্ঞ কমিটীৰ পৰামৰ্শ মানি প্ৰকল্পটোৰ পুনৰ নিৰ্মাণৰ দাবী জনাইছে, যাতে স্থানীয় ৰাইজৰ জীৱন আৰু পৰিৱেশৰ সুৰক্ষা নিশ্চিত কৰিব পৰা যায়।
ইয়াৰ উপৰিও, ৰাজীব শইকীয়াই বিজেপিৰ অসম প্ৰদেশৰ সভাপতি দিলীপ শইকীয়াক প্ৰত্যাহ্বান জনাই কয় যে বিজেপিয়ে এই বিষয়ত ৰাইজৰ সন্মুখত নিজৰ স্থিতি স্পষ্ট কৰক। তেওঁ অভিযোগ কৰিছে যে বিজেপিয়ে ক্ষমতাত থকাৰ সময়ত জনমতক উপেক্ষা কৰি এই বৃহৎ নদীবান্ধৰ নিৰ্মাণৰ পোষকতা কৰিছে। তেওঁ কয়, “বিজেপিৰ নেতৃত্ব আৰু অসমৰ মুখ্যমন্ত্ৰী হিমন্ত বিশ্ব শৰ্মা কেন্দ্ৰৰ ওচৰত লেও হেও হৈ থকাৰ বাবেই গেৰুকামুখৰ প্ৰকল্পৰ বিপদৰ বিষয়ে কোনো পদক্ষেপ লোৱা নাই।”
নামনি সোৱণশিৰি জলবিদ্যুৎ প্ৰকল্পৰ নিৰ্মাণৰ সময়ত বাৰম্বাৰ ভূমিস্খলন, নদীৰ পানী শুকাই যোৱা আৰু অন্যান্য প্ৰাকৃতিক দুৰ্যোগৰ ঘটনাই স্থানীয় ৰাইজৰ মাজত আতংকৰ সৃষ্টি কৰি আহিছে। আপৰ নেতাজনে দাবী কৰিছে যে এই প্ৰকল্পৰ ফলত লখিমপুৰ, ধেমাজি আৰু মাজুলীৰ দৰে অঞ্চলৰ জনজীৱন আৰু পৰিৱেশৰ ওপৰত গুৰুতৰ প্ৰভাৱ পৰিব। তেওঁ কেন্দ্ৰীয় চৰকাৰক এই প্ৰকল্পৰ কাৰিকৰী দিশসমূহ পুনৰীক্ষণ কৰি সুৰক্ষিত পদক্ষেপ গ্ৰহণৰ আহ্বান জনাইছে।
