ৰাজ্যৰ ভয়াৱহ কোভিড পৰিস্থিতিৰ প্ৰতি সঁহাৰি জনাই মুখ্যমন্ত্ৰীৰ আহ্বানত সৰ্বশিক্ষাৰ অধীনত ঠিকাভিত্তিত কৰ্মৰত টেট উত্তীৰ্ণ শিক্ষকসকলে মুখ্যমন্ত্ৰীৰ সাহায্য পুঁজিলৈ এদিনৰ দৰমহা আগবঢ়াইছে।
এক বিবৃতি যোগে সদৌ অসম প্ৰাথমিক টেট্ উত্তীৰ্ণ শিক্ষক সমাজৰ সভাপতি আৰু সম্পাদকদ্বয়ে কয়, “কোভিড অতিমাৰীৰ এই সংকটৰ সময়ত ৰাজ্যখনৰ মুখ্যমন্ত্ৰী ড° হিমন্ত বিশ্ব শৰ্মা তথা মন্ত্ৰীসকলে দিন ৰাতি একাকাৰ কৰি নিজৰ দায়িত্ব পালনৰ বাবে অহৰহ চেষ্টা কৰি আছে। মুখ্যমন্ত্ৰীৰ দায়িত্ব গ্ৰহণৰ পাছত ড° হিমন্ত বিশ্ব শৰ্মাই একপ্ৰকাৰ বিৰামহীনভাৱে নিজৰ কৰ্তব্য পালন কৰি ৰাজ্যখনক কোভিড সংকটৰ পৰা মুক্ত কৰিবলৈ যত্ন কৰিছে। এনে সময়ত ৰাজ্যখনৰ শিক্ষক সকলৰো কিছু দায়িত্ব আছে বুলি শিক্ষক সমাজে অনুভৱ কৰে।”
তেওঁলোকে লগতে কয় “বিদ্যালয়সমূহত অনলাইন পাঠদান চলাই নিয়াৰ সমান্তৰালকৈ অসমৰ ৰাইজৰ হৈ সেৱা কৰাৰ সুবিধা গ্ৰহণ কৰি সৰ্বশিক্ষাৰ অধীনৰ শিক্ষক সকলে নিজৰ এদিনৰ দৰমহা মুখ্যমন্ত্ৰীৰ সাহায্য পুঁজিলৈ আগবঢ়োৱাৰ সিদ্ধান্ত লৈছে।”
যোৱা ২১ মে’ ত অনলাইনযোগে অনুষ্ঠিত হোৱা ৩ ঘণ্টা যোৰা কাৰ্যনিৰ্বাহক সভাত সকলো জিলা সমিতিৰ সৰ্বসন্মত পৰামৰ্শ অনুসৰি এই সিদ্ধান্ত গ্ৰহণ কৰা হয় বুলি সংগঠনটোৱে জানিবলৈ দিয়ে।
ইতিমধ্যে ৰাজ্যৰ মু্খ্যমন্ত্ৰী, শিক্ষামন্ত্ৰী আৰু সৰ্বশিক্ষাৰ মিছন সঞ্চালকক আনুষ্ঠানিকভাৱে এই সিদ্ধান্ত পত্ৰযোগে প্ৰেৰণ কৰা হৈছে।
উল্লেখযোগ্য যে, যোৱা বছৰো বানপানী আৰু কোভিড অতিমাৰীৰ সংকটকালত এইসকল শিক্ষকে চৰকাৰলৈ ধনৰাশি আগবঢ়াইছিল।
মুখ্যমন্ত্ৰীৰ সাহায্য পুঁজিৰ জৰিয়তে মানৱ সেৱাৰ সুবিধা প্ৰদানৰ বাবে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাক সংগঠনটোৱে ধন্যবাদ জ্ঞাপন কৰাৰ লগতে অসমৰ সমূহ ৰাইজক সাধ্যানুসৰি সাহায্য আগবঢ়াই ৰাজ্যখনক সোনকালে কোভিড মুক্ত কৰাত চৰকাৰৰ সৈতে সহযোগিতা কৰিবলৈ সংগঠনটোৱে আহ্বান জনায়।
