অহা ২১ নবেম্বৰত তুৰা লোকসভা সমষ্টিৰ সাংসদ আগাথা কে চাংমাই চিকিৎসক পেট্ৰিক ৰংমা মাৰাকৰ সৈতে বিবাশপাশত আবদ্ধ হ’ব।
পৰিয়ালৰ এটা সূত্ৰই নৰ্থ-ইষ্ট নাওক জানিবলৈ দি কয় যে সাংসদ গৰাকীৰ বিবাহৰ দিন হিচাপে অহা ২১ নবেম্বৰৰ দিনটো খাটাং কৰা হৈছে। বিবাহৰ অনুষ্ঠানটি অতি সাধাৰণভাৱে অনুষ্ঠিত হ’ব বুলিও জনায়।
আগাথা কে চাংমা হৈছে লোকসভাৰ প্ৰাক্তন অধ্যক্ষ পূৰ্ণ আগিতোক চাংমাৰ কনিষ্ঠ কন্যা।
ইয়াৰ উপৰি তেওঁ মেঘালয়ৰ মুখ্য মন্ত্ৰী কনৰাড কে চাংমা আৰু গৃহ মন্ত্ৰী জেমচ কে চাংমাৰ কনিষ্ঠ ভগ্নী।
যোৱা শনিবাৰে পূব গাৰো পাহাৰ জিলাৰ ৰাজাচিমলা গাঁৱত অতি সাধাৰণভাৱে আয়োজিত এক অনুষ্ঠানত ৩৯ বছৰীয়া সাংসদ গৰাকী আৰু চিকিৎসক পেট্ৰিক ৰংমা মাৰাকৰ আঙঠি পিন্ধোৱা পৰ্ব সম্পন্ন হয়।
আঙঠি পিন্ধোৱা পৰ্বৰ দিনা আগাথাৰ মাতৃ চৰাদিনি কে চাংমা, ভাতৃৰ লগতে উত্তৰ তুৰা সমষ্টিৰ বিধায়ক থমাছ চাংমা উপস্থিত আছিল।
ইফালে জানিব পৰা মতে ৩৯ বছৰীয়া সাংসদ গৰাকীৰ বিবাহৰ অনুষ্ঠানটি গাৰো পাহাৰৰ আটাইতকৈ ডাঙৰ কেথলিক চাৰ্চ চেক্ৰেড হাৰ্ট শ্ৰাইন (Sacred Heart Shrine)ত অনুষ্ঠিত হ’ব।
অতি সাধাৰণভাৱে অনুষ্ঠিত হ’ব লগীয়া বিবাহৰ অভ্যৰ্থনা অনুষ্ঠান আগাথা চাংমাৰ তুৰাস্থিত ৱালবাকগ্ৰেৰ বাসগৃহত আয়োজন কৰা হৈছে।
দিল্লীত জন্মগ্ৰহণ কৰা আগাথাই পুনে বিশ্ববিদ্যালয়ৰ পৰা এল এল বিৰ ডিগ্ৰী গ্ৰহণ কৰিছিল। ইয়াৰ পিছতে তেওঁ য়ুকে(UK)ৰ নটিংহাম য়ুনিভাৰ্চিটিৰ পৰা এনভাৰোমেণ্টেল মেনেজমেণ্টত মাষ্টাৰ ডিগ্ৰী লৈছিল।
উল্লেখ্য যে ২০০৮ চনত প্ৰথমবাৰৰ বাবে উপ নিৰ্বাচনৰ জৰিয়তে লোকসভালৈ নিৰ্বাচিত হৈছিল আগাথা। সেই সময়ত পিতৃয়ে ৰাজ্যৰ ৰাজনীতিত যোগ দিয়াৰ বাবেই তুৰা সমষ্টিটোক প্ৰতিনিধিত্ব কৰাৰ সুযোগ পাইছিল আগাথা চাংমাই।
ইয়াৰ পিছতে ২০০৯ চনত নেশ্যনেল পিপলছ পাৰ্টিৰ পৰা প্ৰতিদ্বন্দ্বিতা কৰি লোকসভালৈ নিৰ্বাচিত হয় আৰু য়ু পি এৰ দ্বিতীয় কাৰ্যকালৰ সৰ্বকনিষ্ঠ মন্ত্ৰী হিচাপেও কাৰ্যনিৰ্বাহ কৰে।
আনহাতে তেওঁৰ হ’ব লগীয়া চিকিৎসক স্বামী বৰ্তমান চিলংস্থিত নৰ্থ-ইষ্টাৰ্ণ ইণ্ডিৰা গান্ধী ৰিজনেল ইনষ্টিটিউট অব হেল্থ এণ্ড মেডিকেল চায়েন্সেৰ ৰেচিডেণ্ট চিকিৎসক হিচাপে কৰ্মৰত।
