জাগুনৰ আৰক্ষী বিষয়াৰ বিৰুদ্ধে মহিলাক আতিশয্যৰ অভিযোগ

এগৰাকী বিবাহিত মহিলাক প্ৰেমৰ প্ৰস্তাৱ আগবঢ়াই হাৰাশাস্তি কৰি থকাৰ গুৰুতৰ অভিযোগ উত্থাপিত হৈছে স্বয়ং তিনিচুকীয়া জিলাৰ জাগুন আৰক্ষী চকীৰ ভাৰপ্ৰাপ্ত বিষয়া গৰাকীৰ বিৰুদ্ধে। আজি দিচপুৰ প্ৰেচ ক্লাবত এখন সংবাদমেল অনুষ্ঠিত কৰি এই অভিযোগ উত্থাপন কৰে ভুক্তভোগী মহিলাগৰাকীয়ে।

লগতে দুটি সন্তানৰ মাতৃ মহিলাগৰাকীয়ে ভাৰপ্ৰাপ্ত আৰক্ষী বিষয়া পুলক কুমাৰে ক্ষমতা প্ৰয়োগ কৰি তেওঁৰ স্বামীৰ বিৰুদ্ধে ভুৱা অভিযোগ আনি গ্ৰেপ্তাৰ কৰাৰো অভিযোগ উত্থাপন কৰে।

সংবাদমেলত মহিলাগৰাকীয়ে কয়, ‘আৰক্ষী বিষয়া পুলক কুমাৰে দীৰ্ঘদিন ধৰি জাগুন বজাৰ উপৰিও ৰাষ্টাই ঘাটে লগ ধৰি প্ৰেমৰ প্ৰস্তাৱ দি অহাৰ লগতে অশ্লীল ইংগিত প্ৰদান কৰি আহিছে। তেওঁ মোক প্ৰায়ে বজাৰ কৰিবলৈ আৰু বাহিৰলৈ ফুৰিবলৈ যাবলৈ ল’গ ধৰে। তেওঁ মোৰ সাংসাৰিক জীৱনত যথেষ্ট অসুবিধা সৃষ্টি কৰি আছে।’

মহিলাগৰাকীয়ে কয় যে প্ৰেমৰ প্ৰস্তাৱ নাকচ কৰাৰ বাবেই আৰক্ষী বিষয়াগৰাকীয়ে যোৱা ২৬ জুনত তেওঁৰ স্বামীৰ বিৰুদ্ধে ড্ৰাগছৰ ব্যৱসায়ৰ অভিযোগ জাপি দি গ্ৰেপ্তাৰ কৰিছে। তেওঁ লগতে কয় যে তেওঁৰ স্বামী এগৰাকী ড্ৰাগছ আসক্ত ব্যক্তি। অৱশ্যে তেওঁ ড্ৰাগছৰ ব্যৱসায়ৰ লগত জড়িত থকাৰ অভিযোগ অস্বীকাৰ কৰে।

ইফালে মহিলাগৰাকীয়ে তিনিচুকীয়া জিলাৰ আৰক্ষী অধীক্ষকৰ উপৰিও আৰক্ষী সঞ্চালক প্ৰধানক এক আবেদনযোগে এই ঘটনা সন্দৰ্ভত অৱগত কৰে।