কাশ্মীৰৰ শ্ৰীনগৰৰ হোটেলৰ পৰা এগৰাকী স্থানীয় ছোৱালীৰ সৈতে আটক মেজৰ লিটুল গগৈ

যোৱা বছৰ  তেওঁৰ সেনাৰ জীপত এগৰাকী লোকক মানৱ ঢাল হিচাপে ব্যৱহাৰ কৰাৰ অভিযোগত বাতৰিৰ শিৰোণাম দখল কৰা মেজৰ লিটুল গগৈক শ্ৰীনগৰৰ এখন হোটেলৰ পৰা এগৰাকী স্থানীয় ছোৱালীৰ সৈতে আজি আৰক্ষীয়ে আটক কৰিছে। ৰাষ্ট্ৰীয় আলোচনী আউটলুকৰ ৱেবছাইটত প্ৰকাশিত এই বাতৰিয়ে ইতিমধ্যে চাঞ্চল্যৰ সৃষ্টি কৰিছে।

আৰক্ষী সূত্ৰই জনোৱা মতে কেন্দ্ৰীয় কাশ্মীৰৰ বাডগাম অঞ্চলত নিযুক্ত হৈ থকা গগৈৰ বিৰুদ্ধে আইনী প্ৰক্ৰিয়া গ্ৰহণ কৰা হৈছে। আৰক্ষীৰ মুখপাত্ৰই জানিব দিয়া মতে ৰাতিপুৱা প্ৰায় ১১ বজাত হোটেল গ্ৰেণ্ড মমতাৰ পৰা হোটেলখনত উদ্ভৱ হোৱা উত্তপ্ত বাদ-বিবাদৰ বাবে খানয়াৰ আৰক্ষী থানালৈ এটা ফোনকল আহিছিল।

আৰক্ষীৰ সূত্ৰই কয় যে এগৰাকী লোকৰ সৈতে এটি নাবালিকা ছোৱালী মেজৰ গৰাকীক লগ ধৰিবলৈ আহিছিল। মেজৰ গৰাকীয়ে ইতিমধ্যে হোটেলৰ পৰা বিদায় লোৱাৰ বাবে ‘চেক ইন’ কৰিছিল। হোটেলৰ মেনেজাৰ গৰাকীয়ে ছোৱালীজনীক কোঠাটোলৈ যাবলৈ অনুমতি দিয়া নাছিল আৰু তাক লৈ বাক্-বিতণ্ডাৰ সৃষ্টি হৈছিল।

ইয়াৰ পিছত আৰক্ষীয়ে হোটেলখনলৈ এটা বাহিনী পঠিয়াই দিছিল আৰু তেওঁলোকে তাত গৈ দেখিছিল যে ‘বাডগামৰ সমীৰ আহমেদ নামৰ লোকগৰাকীৰ সৈতে এগৰাকী মহিলা’ কোনোবা ব্যক্তিক লগ ধৰিবলৈ আহিছে। কিন্তু হোটেলৰ পৰিচাৰিকাই তেওঁলোকক ব্যক্তগৰাকীক লগ ধৰিবলৈ অনুমতি দিয়া নাছিল।

সূত্ৰসমূহে জানিব দিয়া মতে আৰক্ষীৰ দলটোৱে ঘটনাস্থলীত উপস্থিত হৈ আটাইকেইজন লোককে থানালৈ লৈ আনিছিল। তেওঁলোকে জানিব পাৰিছিল যে ছোৱালীজনীয়ে এগৰাকী সেনা বিষয়াক লগ ধৰিবলৈ আহিছিল।

আৰক্ষীয়ে সেনা বিষয়াগৰাকীৰ নথিপত্ৰ আৰু পৰিচয় সংগ্ৰহ কৰিছে। আৰক্ষীয়ে সেনা বিষয়াগৰাকীকৰ ভাষ্য ৰেকৰ্ডিং কৰাৰ পিছত বিষয়াগৰাকীক যাবলৈ দিয়ে।