কয়লাৰ ছিণ্ডিকেট বন্ধ কৰাৰ হুংকাৰ মন্ত্ৰী চুম’ ৰংহাঙৰ

ৰাজ্যত চলি থকা কয়লাৰ ছিণ্ডিকেট বন্ধ কৰাৰ  হুংকাৰ দিছে পাৰ্বত্য অঞ্চল উন্নয়ন বিভাগ তথা খনি আৰু খনিজাত সামগ্ৰী বিভাগৰ নৱ নিযুক্ত মন্ত্ৰী চুম’ ৰংহাঙে। শুকুৰবাৰে দিছপুৰত অনুষ্ঠিত কৰা এখন সংবাদমেলত ৰংহাঙে কয় যে ৰাজ্যত থকা ডাঙৰ ডাঙৰ কয়লা ক্ষেত্ৰসমূহৰ কৰ্তৃত্ব ক’ল ইণ্ডিয়া লিমিটেডৰ হাতত থাকে। কেৱল সৰু সৰু কয়লা ক্ষেত্ৰসমূহৰ ওপৰতহে ৰাজ্য চৰকাৰৰ ক্ষমতা থাকে।

উমৰাংছ’ত তিনিটা কয়লা ক্ষেত্ৰ বিধিগতভাৱে খনন হোৱাৰ বাদে আন সকলো কয়লা ক্ষেত্ৰত চোৰাংভাৱে খনন চলি থাকে বুলিও মন্ত্ৰীগৰাকীয়ে জানিবলৈ দিয়ে।মন্ত্ৰী চুম’ ৰংহাঙে কয় যে অবৈধ কয়লা খনন বন্ধ কৰা হ’ব আৰু এই কয়লা ক্ষেত্ৰসমূহ বিধিগতভাৱে খনন কৰি ৰাজহ সংগ্ৰহৰ পৰিমাণ বৃদ্ধি কৰা হ’ব।

খনি আৰু খনিজাত সামগ্ৰী বিভাগটো সৰু বিভাগ, এই বিভাগটোৰ কাৰ্যালয় ৰাজ্যত এটাই আছে। তাতো প্ৰায় ৫০ শতাংশ পদ খালী হৈ আছে বুলি উল্লেখ কৰি মন্ত্ৰী ৰংহাঙে কয় যে চলিত বৰ্ষত বিভাগটোৰ বাবে মাত্ৰ সাত কোটি টকাহে ধাৰ্য কৰা হৈছে।

আনহাতে, নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে অসমৰ প্ৰতি সদয় হৈ ৰয়েল্টি মুকলি কৰি ৰাজ্যৰ উন্নয়নৰ পথ প্ৰশস্ত কৰিছে বুলি কেন্দ্ৰক প্ৰশংসা কৰি আহিছে যদিও সৰ্বানন্দ সোণোৱাল নেতৃত্বাধীন ৰাজ্য চৰকাৰে হাজাৰ হাজাৰ কোটি টকাৰ খাৰুৱা তেলৰ ৰয়েল্টি আদায় কৰিব পৰা নাই।

অইলৰ পৰা ৪৯০২ কোটি আৰু অ’ এন জি চিৰ পৰা ১৪০৪ কোটি মুঠ ৬৩০৬ কোটি টকা ৰয়েল্টি পাবলৈ বাকী আছিল। ২০১৭-১৮ বৰ্ষত ৬৭০ কোটি টকা ৰয়েল্টি আদায় পালে যদিও এতিয়াও ৫৬৩৬ কোটি টকাৰ ৰয়েল্টি অসমে পাবলৈ বাকী আছে। পাৰ্বত্য অঞ্চল উন্নয়ন বিভাগৰ লগতে খনি আৰু খনিজাত সামগ্ৰী বিভাগৰ দায়িত্ব লাভ কৰা নৱনিযুক্ত মন্ত্ৰী চুম’ ৰংহাঙে শুকুৰবাৰে ৰাজ্য চৰকাৰে বৃহৎ পৰিমাণৰ ৰয়েল্টি পাবলৈ বাকী থকাৰ তথ্য প্ৰকাশ কৰে।

মন্ত্ৰী চুম’ ৰংহাঙে লাভ কৰা আনটো পাৰ্বত্য অঞ্চল উন্নয়ন বিভাগৰ বিষয়ে উল্লেখ কৰি কয় যে এই বিভাগটোৰ অধীনত মাত্ৰ তিনিখন জিলাহে আছে। আন জিলাৰ বাবে এই বিভাগটোৰ কোনোধৰণৰ কাম নাই। তেওঁ কয় যে এই বিভাগটোত আছে মাত্ৰ সাতজন কৰ্মচাৰী। ৰংহাঙৰ বক্তব্যত শুকুৰবাৰে অসন্তুষ্টিৰ কথা স্পষ্ট হৈ পৰে।

তেওঁ কয় যে পাৰ্বত্য এলেকা উন্নয়ন বিভাগৰ অধীনত থকা কাৰ্বি আংলঙলৈ এই বছৰ আবণ্টিত পুঁজিৰ পৰিমাণ ৩৭৪.২৫ কোটি আৰু উত্তৰ কাছাৰ স্বায়ত্ত পৰিষদৰ পুঁজিৰ পৰিমাণ ১৬১.৩৯ কোটিৰে মুঠ ৫৩৫.৬৪ কোটি টকা। এই পুঁজি স্বায়ত্ত পৰিষদ দুখনলৈ যায় বুলি উল্লেখ কৰি মন্ত্ৰীগৰাকীয়ে আক্ষেপেৰে কয় যে বিভাগটোৱে মাত্ৰ পুঁজি ব্যয়ৰ নিৰীক্ষণ কৰাৰ লগতে ব্যাৱহাৰিক প্ৰমাণ-পত্ৰ কেন্দ্ৰলৈ প্ৰেৰণ কৰাৰ দৰে কামবোৰহে কৰে।