গুৱাহাটীত চিৰিয়াখানাৰ ‘বন ধ্বংস কৰি’ স্থাপন ‘বনসৃষ্টি’ বিপণি

গুৱাহাটীৰ অসম ৰাজ্যিক চিৰিয়াখানা ( Assam State Zoo cum Botanical Garden )ৰ ভিতৰত বন ধ্বংস কৰি ‘বনসৃষ্টি’ নামৰ বিপণি খোলাৰ অভিযোগ আনিছে ‘চিৰিয়াখানা সুৰক্ষা মঞ্চ’ই।

চিৰিয়াখানা সুৰক্ষা মঞ্চৰ সাধাৰণ সম্পাদক ৰাজকুমাৰ বৈশ্যই আজি ১৩ এপ্ৰিলত এন ই নাওক জনাই যে চিৰিয়াখানাৰ ভিতৰতে লে’ডিজ ক্লাব নিৰ্মাণ কৰি ক্লাবটোৰ অধীনত এই ‘বনসৃষ্টি’ নামৰ বিপণিসমূহ মুকলি কৰা হৈছে।

‘এই দোকানসমূহ নিৰ্মাণৰ বিৰোধিতাৰে ধাৰাবাহিক প্ৰতিবাদ কৰা হৈছিল আৰু বিধানসভাত যোৱা ৪ এপ্ৰিলৰ দিনা এই বিষয়ত আলোচনাৰ পিছত এই দুষ্কাৰ্য্যৰ তদন্ত চলাবলৈ বন বিভাগৰ প্ৰধান সচিবক দায়িত্ব দিছিল যদিও যোৱা ১০ এপ্ৰিল তাৰিখে এই বনসৃষ্টি নামৰ বিপণিসমূহ মুকলি কৰিলে’ বুলি বৈশ্যই অভিযোগ কৰে।

বৈশ্যই অভিযোগ কৰে যে তেজচ মৰিস্বামী নামৰ ডি এফ অ’গৰাকীয়ে এই বিপণিসমূহ নিৰ্মাণৰ অনুমতি দিছে। বৈশ্যৰ কয় যে ঠাইখিনিৰ সৌন্দৰ্য্য হানি হ’ব বুলিয়ে আগৰগৰাকী ডি এফ অ’ এছ কে শৰ্মাই এই বিপণিসমূহ নিৰ্মাণ কৰিবলৈ দিয়া নাছিল।

কিন্তু ‘ডি এফ অ’গৰাকী অমান্তি হোৱা কাৰণে’ তেওঁক ‘বদলি কৰা হয়’ বুলি বৈশ্যই দাবী কৰে।

বৈশ্যই কয় যে লে’ডিজ ক্লাবৰ দোকানসমূহ থকা অঞ্চলত পূৰ্বে সেউজীয়া ঘাঁহনি আছিল আৰু তাত স্থানীয় লোকসকলে খোজ কঢ়াৰ লগতে বনভোজ দলসমূহে ঘাঁহনিত বহি খাদ্যগ্ৰহণো কৰিছিল।

চিৰিয়াখানাৰ পাৰ্কিং থলীত বা আন ঠাইত বিপণিসমূহ নিৰ্মাণ কৰিলে তেওঁলোকৰ আপত্তি নাই বুলি জনাই মঞ্চৰ সম্পাদকগৰাকীয়ে।