গুৱাহাটীত ৰতন টাটাই আনুষ্ঠানিকভাৱে মুকলি কৰিলে নৰ্থ-ইষ্ট স্মল ফাইনেন্স বেংক

আজি গুৱাহাটীত আনুষ্ঠানিকভাৱে মুকলি কৰা হ’ল নৰ্থ-ইষ্ট স্মল ফাইনেন্স বেংক (North East Small Finance Bank)। আজি সন্ধিয়া মহানগৰীৰ হোটেল তাজ ভিভাণ্টাত আয়োজিত এটা গাম্ভীৰ্য্যপূৰ্ণ অনুষ্ঠানত আনুষ্ঠানিকভাৱে বেংকটো মুকলি কৰে টাটা ট্ৰাষ্টৰ অধ্যক্ষ ৰতন টাটাই। ৰাষ্ট্ৰীয় গ্ৰামীন বিকাশ নিধিৰ অধীনত আৰম্ভ হোৱা এই বেংকটোৰ সমগ্ৰ উত্তৰ-পূবৰ বিভিন্ন স্থানত মুঠ ১২৯টা শাখা থাকিব বুলি বেংকটোৰ কৰ্তৃপক্ষই জানিবলৈ দিয়ে।

নৰ্থ-ইষ্ট স্মল ফাইনেন্স বেংকটো আনুষ্ঠানিকভাৱে মুকলি কৰি ৰতন টাটাই বেংক কৰ্তৃপক্ষলৈ অভিনন্দন জনোৱাৰ লগতে উত্তৰ-পূৰ্বাঞ্চলৰ অৰ্থনৈতিক উন্নয়নৰ ক্ষেত্ৰত অগ্ৰণী ভূমিকা ল’বলৈ আহ্বান জনায়। তেওঁ লগতে এই বেংকে উত্তৰ-পূবৰ গ্ৰামাঞ্চলৰ ৰাইজৰ প্ৰগতিত বিশেষভাৱে অৰিহণা যোগাব বুলি আশা প্ৰকাশ কৰে।

অনুষ্ঠানত উপস্থিত থাকি ৰাজ্যৰ বিত্ত, স্বাস্থ্য আৰু গড়কাপ্তানী মন্ত্ৰী ড০ হিমন্ত বিশ্ব শৰ্মাই বেংকটোৰ ‘ডেবিট কাৰ্ড’ মুকলি কৰে। ড০ শৰ্মাই ভাষণ প্ৰদান কৰি কয়, “ভাৰতৰ দৰে দেশৰ উন্নয়নৰ বাবে দেশখনৰ অৰ্থনৈতিক বুনিয়াদ গঢ়ি তোলাটো নিতান্তই প্ৰয়োজনীয়। প্ৰধান মন্ত্ৰী নৰেন্দ্ৰ মোদীয়ে এই অৰ্থনৈতিক বুনিয়াদ গঢ়ি তোলাৰ বাবে ‘জন-ধন বীমা’ৰ ব্যৱস্থা কৰিছে।” তেওঁ লগতে উত্তৰ-পূবত অৰ্থনৈতিক বুনিয়াদ গঢ়ি তোলাৰ ক্ষেত্ৰত নৰ্থ-ইষ্ট স্মল ফাইনেন্স বেংকক বিশেষ ভূমিকা ল’বলৈ আহ্বান জনায়।

অনুষ্ঠানত বেংকটোৰ অধ্যক্ষ ব্ৰীজ মোহনে এই বেংকটো এটা গ্ৰাহক-কেন্দ্ৰিক বেংক হিচাপে গঢ়ি তোলা হ’ব বুলি জানিবলৈ দিয়ে। তেওঁ কয় যে এই বেংকে ক্ষুদ্ৰ সঞ্চয় আৰু কম আয়ৰ লোকক সৰ্বাধিক গুৰুত্ব দিব বুলি জানিবলৈ দিয়ে।

ইয়াৰ উপৰি উত্তৰ-পূৰ্বাঞ্চলৰ গ্ৰামাঞ্চলৰ ৰাইজৰ মাজত উদ্যোগশীলতা আৰু স্বনিয়োজনৰ সৃষ্টিত নৰ্থ-ইষ্ট স্মল ফাইনেন্স বেংকে অগ্ৰাধিকাৰ দিব বুলি কয়।