ডুমডুমাত চাকৰি দিয়াৰ নামত ধন লুণ্ঠন কৰা মহিলা আটক
প্ৰাথমিক-মধ্য ইংৰাজী বিদ্যালয়ত স্কুল মাতৃ নিয়ুক্তি দিয়াৰ নামত লাখ লাখ টকা আত্মসাৎ কৰা প্ৰৱঞ্চক দলৰ এগৰাকী মহিলাক শনিবাৰে ডুমডুমা আৰক্ষীয়ে আটক কৰে।
ডুমডুমা পথাৰ গাঁও নিৱাসী আটকাধীন জানী গগৈ নামৰ মহিলাগৰাকীয়ে ‘বুনিয়াদী বিদ্যালয় মাতৃ এছ’চিয়েশ্যন, অসম’ নামৰ এটা সংগঠনৰ তিনিচুকীয়া জিলা সমিতিৰ সম্পাদিকা হৈ জিলাখনৰ বিভিন্ন প্ৰাৰ্থীৰ পৰা ২০১১ চনৰ পৰাই ‘স্কুল মাতৃ পদ’ত চাকৰি দিয়াৰ নামত লাখ লাখ টকা আত্মসাৎ কৰাৰ অভিযোগ উত্থাপন কৰিছে।
স্কুল মাতৃৰ নামত বুনিয়াদী বিদ্যালয় মাতৃ এছ’চিয়েশ্যন, অসমৰ সভানেত্ৰী আৰু সাধাৰণ সম্পাদিকা ক্ৰমে বিনু বৰুৱা আৰু ডিম্বেশ্বৰী লস্কৰ স্বাক্ষৰিত পত্ৰত মাতৃ শিক্ষাৰ চাকৰিৰ বাবে এছ’চিয়েশ্যনৰ সদস্য হ’লেহে চাকৰি নিয়মীয়াকৰণৰ হোৱাৰ প্ৰলোভনেৰে প্ৰত্যেক প্ৰাৰ্থীৰ পৰা ২৫ হাজাৰ টকাকৈ সংগ্ৰহ কৰি কেৱল তিনিচুকীয়া জিলাৰ পৰাই বৰ্তমানলৈ ৭৩জন প্ৰাৰ্থীৰ পৰা ১৮ লাখ ২৫ হাজাৰ টকা সংগ্ৰহ কৰি এপ্ৰিলৰ ভিতৰত নিযুক্তি পত্ৰ দিয়াৰ প্ৰতিশ্ৰুতি দিছিল প্ৰৱঞ্চক মহিলাগৰাকীয়ে।
আনহাতে ২৬৩গৰাকী প্ৰাৰ্থীৰ পৰা বৃহৎ পৰিমাণৰ ধন দাবী কৰি এছ’চিয়েশ্যনে অহা ৭ মাৰ্চৰ ভিতৰত এই ধন পৰিশোধৰ সময়সীমা বান্ধি দিয়ে।
এই সন্দৰ্ভত জিলাখনৰ মাৰ্ঘেৰিটা, পেঙেৰী, বাঘজান, কাকজান আদি ঠাইৰ কেইবাগৰাকী প্ৰাৰ্থীৰ পৰা বিগত ২০১১ চনতেই স্কুল মাতৃৰ চাকৰি দিয়াৰ নামত ১৫/১৮ হাজাৰকৈ আগধন লোৱাৰ পাছতো চাকৰিৰ কোনো নিশ্চয়তা দিব নোৱৰা জানী গগৈয়ে পুনৰ আৰু ২৫ হাজাৰকৈ টকা বিচৰাত ভুক্তভোগী মহিলাসকলে চাকৰি দিব নোৱৰা জানীক পূৰ্বে দিয়া টকা ঘূৰাই বিচাৰোতে তৰ্কাতৰ্কি হয় আৰু শেষত ভুক্তভোগী মহিলাকেইগৰাকীমানে শনিবাৰে ডুমডুমা থানাত এজাহাৰ দাখিল কৰাত আৰক্ষীয়ে মহিলাগৰাকীক থানালৈ আনি প্ৰাথমিক জেৰা কৰোতেই সমগ্ৰ ঘটনা পোহৰলৈ আহে বুলি জানিব পৰা গৈছে।
প্ৰৱঞ্চক মহিলাগৰাকীৰ বিৰুদ্ধে কঠোৰ ব্যৱস্থা গ্ৰহণৰ দাবী উত্থাপন কৰিছে ভুক্তভোগী মহিলাসকলে।