ড০ হিমন্ত বিশ্ব শৰ্মাৰ মন্তব্য দুৰ্ভাগ্যজনক আৰু সকলোৱে গৰিহণা দিব লাগে : বদৰুদ্দিন আজমল

শেহতীয়াকৈ আৰবী ভাষাক অসমৰ বিদ্যালয়ৰ পাঠ্যক্ৰমত অন্তৰ্ভুক্ত কৰা সন্দৰ্ভত মন্তব্য দিবলৈ গৈ ৰাজ্যৰ শিক্ষা মন্ত্ৰী ড০ হিমন্ত বিশ্ব শৰ্মাই কৰা ৰুচিহীন বক্তব্যৰ প্ৰতিক্ৰিয়া হিচাপে মন্ত্ৰী শৰ্মাৰ বিৰুদ্ধে জাঙুৰ খাই উঠিছে এ আই য়ু ডি এফ প্ৰধান বদৰুদ্দিন আজমল। আৰবী ভাষা সন্দৰ্ভত সদনৰ মজিয়াত শিক্ষা মন্ত্রীজনে দিয়া বক্তব্য দুৰ্ভাগ্যজনক বুলি অভিহিত কৰি আজমলে এনে বক্তব্যক সকলোৱে ধিক্কাৰ দিব লাগে বুলি কয়।

শিৱসাগৰত কালি দ্বিনী মাদ্ৰাছাৰ উদ্যোগত অনুষ্ঠিত এক জালসাত অংশগ্ৰহণ কৰি শিক্ষা মন্ত্ৰী শৰ্মাক মুচলিম বিৰোধী বুলি অভিহিত কৰে।

আনহাতে আজমলে সংবাদ মাধ্যমৰ আগত এ আই য়ু ডি এফ দলে অনাগত সময়ত বিজেপি বিৰোধী ভূমিকা ল’ব বুলি স্পষ্ট কৰে। এই কাৰণতে দলটো দেশৰ বিৰোধী দল সমূহৰ মৰ্চাৰ অংশ হ’ব বুলি নেতাগৰাকীয়ে সংবাদ মাধ্যমক জানিবলৈ দিয়ে।

ইফালে বিধায়ক শিলাদিত্যৰ বিভিন্ন বিতৰ্কিত মন্তব্য সন্দৰ্ভত সংবাদ মাধ্যমে আজমলৰ প্ৰতিক্ৰিয়া জানিবলৈ বিচৰাত এক তীৰ্যক মন্তব্য কৰে।

আজমলে নিজকে ইণ্টাৰনেশ্যনেল ফিগাৰ বুলি উল্লেখ কৰি শিলাদিত্যৰ দৰে সাধাৰণ এম এল এ সন্দৰ্ভত প্ৰতিক্ৰিয়া প্ৰকাশ কৰি তেওঁক অযথা জনপ্রিয় কৰাৰ কোনো কাৰণ বিচাৰি নেপাই বুলি উপলুঙাসূচক বক্তব্য প্ৰদান কৰে।