নগা চুক্তি ৰাজহুৱা কৰিবলৈ কেন্দ্ৰক আহ্বান মণিপুৰৰ নাগৰিক সমাজৰ সংগঠনৰ

মণিপুৰৰ নাগৰিক সমাজৰ সংগঠনৰ এটি দলে কেন্দ্ৰীয় গৃহ ৰাজ্যমন্ত্ৰী কিৰেন ৰিজেজু, বিজেপিৰ ৰাষ্ট্ৰীয় সভাপতি অমিত শ্বাহ, নাগা সমস্যাৰ আলোচনাৰ মধ্যস্থতাকাৰী আৰ এন ৰবিকে ধৰি আন নেতাসকলক নতুন দিল্লীত সাক্ষাৎ কৰি ২০১৫ চনৰ আগষ্ট মাহত ভাৰত চৰকাৰ আৰু এনএছচিএন (আই এম)ৰ মাজত স্বাক্ষৰিত হোৱা ‘ফ্ৰেমৱৰ্ক এগ্ৰিমেন্ট’ৰ বিষয়বস্তু ৰাজহুৱা কৰাৰ দাবী উত্থাপন কৰে।

নাগৰিক সমাজৰ প্ৰতিনিধি দলটোক নেতৃত্ব দিছিল ইউনাইটেড কমিটিৰ সভাপতি এলাঙবাম জনছন, অল মণিপুৰ ইউনাইটেড ক্লাব’ৰ সভাপতি পি এইছ দেবেন আৰু কাঙলেইপাক নাগৰিক সমাজ সমিতিৰ সভাপতি জিতেন্দ্ৰ নিঙ্গমবাই। নেতাসকলৰ আগত তেওঁলোকে স্থিতি স্পষ্ট কৰি দিয়ে যে মণিপুৰৰ ৰাইজে তেওঁলোকৰ সন্মতি নোহোৱাকৈ হোৱা কোনো চুক্তিকে মানি নলয়। বিশেষকৈ যদিহে ৰাজ্যখনৰ ভৌগলিক অখণ্ডতাৰ সৈতে আপোচৰ বিষয় হয়।

প্ৰতিনিধি দলটোৱে কেন্দ্ৰক সাৱধান কৰি দিয়ে যে নগা ৰাজনৈতিক সমস্যাটোৰ চূড়ান্ত সমাধানৰ সময়ত মণিপুৰৰ ভৌগলিক অখণ্ডতাৰ ক্ষেত্ৰত যদিহে আপোচ কৰা হয় তেতিয়াহ’লে তাৰ ফলত সৃষ্টি হোৱা যিকোনো পৰিস্থিতিৰ বাবে কেন্দ্ৰই দায়ী হ’ব।

আৰ এন ৰবিয়ে দোহাৰে যে ৰাজ্যৰ স্বাৰ্থক সুৰক্ষিত ৰখা হ’ব আৰু কেন্দ্ৰই কোনো ৰাজ্যৰে ভৌগলিক অখণ্ডতাৰ ক্ষেত্ৰত আপোচ নকৰে।

প্ৰতিনিধি দলটোৱে প্ৰধানমন্ত্ৰীলৈ প্ৰেৰণ কৰিবলগীয়া মণিপুৰৰ জনসাধাৰণৰ দাবী আৰু পৰামৰ্শ সম্বলিত এখন স্মাৰক পত্ৰও প্ৰদান কৰে।

ইয়াৰ আগেয়ে প্ৰতিনিধি দলটোৱে কংগ্ৰেছ সভাপতি ৰাহুল গান্ধী, চিপিআই (এম)ৰ ৰাষ্ট্ৰীয় সাধাৰণ সম্পাদক সীতাৰাম য়েচুৰী, দিল্লীৰ মুখ্যমন্ত্ৰী অৰবিন্দ কেজৰিৱাল, এনপিপিৰ সভাপতি কনৰাড ছাংমা আৰু অন্যান্য নেতাক সাক্ষাৎ কৰিছিল।

প্ৰতিনিধি দলটোৱে এতিয়াও কেইবাজনো কেন্দ্ৰীয় নেতাক সাক্ষাৎ কৰাৰ উদ্দেশ্যে ৰাষ্ট্ৰীয় ৰাজধানী চহৰখনত খাপ পিটি আছে।