১০ ছেকেণ্ডৰ ভিতৰত ম’বাইলযোগে তথ্য দিব ৰে’লৱে’ই

ৰে’ল সম্পৰ্কীয় যিকোনো তথ্য মিনিটৰ ভিতৰতে যোগান ধৰাৰ প্ৰতিশ্ৰুতিৰে ভাৰতীয় ৰে’লে আৰম্ভ কৰিছে এটা নতুন যোগাযোগ নম্বৰ।

‘৭৩৪৯৩-৮৯১০৪’ এই নম্বৰটোত ৱটছএপযোগে যোগাযোগ কৰিলে ৰে’লৰ টিকেট কনফাৰমে’চন, ঠিক সময়ত পাব নে লে’ট চলি আছে আদি সকলো তথ্য মিনিটৰ ভিতৰতে যোগান ধৰিব বুলি ৰে’ল বিভাগৰ সূত্ৰই প্ৰকাশ কৰিছে।

ট্ৰে’ইন নম্বৰটো ৱটছএপযোগে প্ৰেৰণ কৰিলে উক্ত ৰে’লখন সম্পৰ্কীয় সকলো তথ্য ১০ ছেকেণ্ডৰ ভিতৰতে যোগান ধৰিব পৰা হ’ব বুলি ৰে’ল সূত্ৰত প্ৰকাশ।

তথ্য যোগানৰ এই ব্যৱস্থাৰ বাবে ভাৰতীয় ৰে’লে মে’ক মাই ত্ৰিপ নামৰ ব্যক্তিগত পৰ্য্যটন সংস্থাটোৰ সৈতে এক চুক্তি স্বাক্ষৰ কৰিছে।

ইয়াৰ আগলৈকে ৰে’ল সম্পৰ্কীয় তথ্যৰ বাবে বিভিন্ন ৱে’বচাইট আৰু এপৰ ওপৰত নিৰ্ভৰ কৰিব লগা হৈছিল।

ৰে’লৰ হেল্পলাইন নম্বৰ আছে যদিও ৱটছ এপযোগে তথ্য প্ৰদানৰ বাবে এইটোৱে ৰে’লৱে’ৰ প্ৰথম পদক্ষেপ।