১৮ জন ভক্তৰ কৰুণ মৃত্যু; ঝাৰখণ্ডৰ দেওঘৰত বাছ-ট্ৰাকৰ সংঘৰ্ষত ভয়ংকৰ দুৰ্ঘটনা

শাওণ মাহত ঝাৰখণ্ডৰ বাবা বৈদ্যনাথ ধামত চলি থকা কানৱাৰ যাত্ৰাৰ সময়ত সংঘটিত হৈছে এক ভয়ংকৰ পথ দুৰ্ঘটনা। দেওঘৰ-বাসুকীনাথ ঘাই পথৰ যমুনিয়া চ’কৰ সমীপত পূণ্যাৰ্থীৰে ভৰা এখন বাছ আৰু এখন ট্ৰাকৰ সংঘৰ্ষ ঘটে।

বাতৰি অনুসৰি, এই দুৰ্ঘটনাত কমেও ১৮ জন ভক্তৰ মৃত্যু হোৱাৰ বিপৰীতে বহুকেইজন ভক্ত আহত হৈছে। একাংশ বাতৰিত মৃত্যুৰ সংখ্যা ৯ জন আৰু আহত ৩০ জনতকৈ অধিক বুলি উল্লেখ কৰা হৈছে। মৃতকৰ সংখ্যা বৃদ্ধি পোৱাৰ আশংকা কৰা হৈছে।

লোকসভাৰ সাংসদ নিশিকান্ত ডুবেই টুইট কৰি কয় যে ‘মোৰ লোকসভা সমষ্টিৰ দেওঘৰত শাওণ মাহত কানৱাৰ যাত্ৰাৰ সময়ত বাছ আৰু ট্ৰাক দুৰ্ঘটনাগ্ৰস্ত হৈ ১৮জন ভক্তৰ মৃত্যু হৈছে। বাবা বৈদ্যনাথ জীয়ে তেওঁলোকৰ পৰিয়ালক শোক সহ্য কৰিবলৈ শক্তি দিয়ক।’

ঘটনাৰ খবৰ পোৱাৰ লগে লগে স্থানীয় প্ৰশাসন, আৰক্ষী আৰু এম্বুলেন্সৰ দল ততাতৈয়াকৈ সেই স্থানত উপস্থিত হয়। আহত আটাইকেইজনকে দেওঘৰৰ বিভিন্ন চিকিৎসালয় আৰু প্ৰাথমিক স্বাস্থ্য কেন্দ্ৰত ভৰ্তি কৰোৱা হৈছে। জিলা প্ৰশাসনে সাহায্য আৰু উদ্ধাৰ অভিযান অব্যাহত ৰাখিছে।

যেতিয়া ভক্তসকলে ‘বল বাম’ ধ্বনিৰে বাবা বৈদ্যনাথ ধামৰ দিশে আগবাঢ়িছিল তেতিয়াই এই দুৰ্ঘটনাটো ঘটিছিল। এই ভয়ংকৰ দুৰ্ঘটনাই অঞ্চলটোত শোকৰ ছাঁ পেলাইছে। এই সন্দৰ্ভত আৰক্ষীয়ে তদন্ত অব্যাহত ৰাখিছে।