বানত বুৰিছে বেইজিং : ৩০ জনৰ মৃত্যু, ক্ষতিগ্ৰস্ত ৮০ হাজাৰৰো অধিক

চীনৰ ৰাজধানী বেইজিঙত ধাৰাসাৰ বৰষুণ আৰু বানপানীৰ ফলত মৃত্যু হৈছে ৩০ জন লোকৰ। বেইজিং প্ৰশাসনে জাৰি কৰিছে বানপানীৰ জৰুৰী সতৰ্কবাণী।

যোৱা সপ্তাহৰ শনিবাৰৰ পৰা আৰম্ভ হোৱা বৰষুণৰ বাবে ৮০ হাজাৰৰো অধিক লোকে আন ঠাইলৈ স্থানান্তৰিত হ’বলগীয়া হৈছে। মঙলবাৰে বিয়লিলৈকে ধাৰাসাৰ বৰষুণ অব্যাহত থাকিব বুলি অনুমান কৰা হৈছে।

চীনৰ ৰাষ্ট্ৰপতি ছি জিনপিঙে বানপানীত নিৰুদ্দেশ হোৱা সকলো লোকক বিচাৰি উলিয়াবলৈ আৰু সাহায্য আৰু উদ্ধাৰৰ কাম কৰিবলৈ নিৰ্দেশ দিছে।

সোমবাৰে জিনপিঙে কয় যে বানপানীত নিৰুদ্দেশ বা আবদ্ধ হৈ থকা লোকক উদ্ধাৰ কৰিবলৈ আৰু ক্ষতিগ্ৰস্ত অঞ্চলৰ পৰা আন ঠাইলৈ মানুহক লৈ যাবলৈ কোনো আপোচ কৰিব নালাগে।

উল্লেখ্য যে জুলাই মাহত বেইজিঙত কেইবাবাৰো বানপানী হৈছে। ইয়াৰে আটাইতকৈ ভয়াৱহ বানপানী হৈছিল ২০১২ চনৰ জুলাই মাহত, তেতিয়া বেইজিঙত এদিনতে ১৯০ মিলিমিটাৰ বৰষুণ হৈছিল। সেইবাৰ বানত ৭৯ জন লোকৰ মৃত্যু হৈছিল।