এইবাৰ কৰ্ণাটকত অক্সিজেনৰ অভাৱত মৃত্যু ২৪ গৰাকী ৰোগীৰ

দেশৰ বিভিন্ন ৰাজ্যত এতিয়া ক’ৰ’নাই কালান্তক ৰূপ ধাৰণ কৰিছে।দিল্লী, মহাৰাষ্ট্ৰ্ আদি ৰাজ্যত ক’ৰ’নাই নিতৌ শ শ লোকৰ প্ৰাণ কাঢ়ি নিছে। ইয়াৰ মাজতে দেশৰ বিভিন্ন ৰাজ্যত অক্সিজেনৰ তীব্ৰ নাটনিয়ে দেখা দিছে।

দিল্লীত অক্সিজেনৰ অভাবহু লোকৰ মৃত্যু ঘটাৰ সমান্তৰাল ভাবে এইবাৰ কৰ্ণাটকতো অক্সিজেনৰ অভাৱত ২৪ গৰাকী ৰোগীয়ে মৃত্যুক সাৱটি লোৱাৰ কথা পোহৰলৈ আহিছে।

দেওবাৰে নিশা কৰ্ণাটকৰ চামৰাজনগৰৰ এখন চিকিৎসালয়ত অক্সিজেনৰ অভাৱত ২৪ গৰাকী ৰোগীয়ে মৃত্যুক আকোঁৱালি লবলগীয়া হয়।

কৰ্ণাটক চৰকাৰৰ এগৰাকী মুখপাত্ৰই প্ৰকাশ কৰা মতে বল্লাৰীৰ পৰা চিকিৎসালয় খনলৈ অক্সিজেন আহি পোৱাৰ কথা আছিল যদিও অক্সিজেন আহি পাওঁতে পলম হোৱাৰ বাবেই এই শোকাবহ ঘটনাটো ঘটিবলৈ পালে।

কৰ্ণাটকৰ মুখ্যমন্ত্ৰী বিএছ য়েডুৰাপ্পাই সমগ্ৰ ঘটনাটোৰ এক তদন্তৰ নিৰ্দেশ দিছে।কৰ্ণাটকতো শেহতীয়াকৈ ক’ৰ’না ৰোগীৰ সংখ্যা লক্ষ্যণীয় ভাবে বৃদ্ধি পাইছে।

এনে পৰিস্থিতিত ৰাজ্য খনত মেডিকেল অক্সিজেনৰ তীগ্ৰ নাটনিয়ে দেখা দিছে।উল্লেখ্য কোভিডে মৃত্যু উপত্যকাত পৰিঁণত কৰা দিল্লীতো অলপতে অত্যাধুনিক চিকিৎসালয় হিচাবে পৰিচিত বাট্ৰা হস্পিতালত অক্সিজেনৰ অভাৱতে লোক কেইজনে কৰুণ মৃত্যুক সাৱটি ল’বলগীয়া হৈছিল।

বাট্ৰা হস্পিতালৰ কাৰ্যবাহী সঞ্চালক ডাঃ  শুধাংশু বংকাটাই প্ৰকাশ কৰা মতে প্ৰয়োজনীয় সময়ত অক্সিজেনৰ যোগান ধৰিব নোৱাৰাৰ বাবেই চিকিৎসকসহ ৰোগী ১২ গৰাকীৰ মৃত্যু ঘটিছিল।

অক্সিজেনৰ অভাৱত মৃত্যু ঘটা চিকিৎসকগৰাকী হৈছে ডাঃআৰ কে হিমথানি। কিছুদিন পূৰ্বে তেঁৱো কোভিডত আক্ৰান্ত হৈছিল। কৰ’নাৰ দ্বিতীয়টো ঢৌত বিপৰ্যস্ত হৈ পৰিছে দিল্লীৰ পৰিস্থিতি। অক্সিজেনৰ অভাৱত বহু ৰোগীৰ মৃত্যু ঘটিছে।

অৱশ্যে শেহতীয়াকৈ বাহিৰৰ ৰাজ্যৰ পৰা দিল্লীলৈ অক্সিজেনৰ সৰবৰাহ বঢ়াই তোলাৰ ফলত ৰাজ্য খনত অক্সিজেনৰ অভাৱ বহু পৰিমাণে দূৰ হৈছে।