কাশ্মীৰত পাক সেনাৰ ভয়ংকৰ আক্ৰমণ, ৪ ভাৰতীয় জোৱানৰ লগতে ৪ অসামৰিক লোক নিহত
শুকুৰবাৰে ৰণক্ষেত্ৰত পৰিণত হয় কাশ্মীৰ উপত্যকা।
যুদ্ধবিৰতি চুক্তি উলংঘা কৰি পাকিস্তানৰ সেনাই উত্তৰ কাশ্মীৰৰ কেইবা ঠাইতো গুলী আৰু মৰ্টাৰেৰে আক্ৰমণ চলোৱাৰ ফলত ৪ জন ভাৰতীয় জোৱানৰ লগতে আন ৪ জন অসামৰিক লোকৰ মৃত্যু ঘটে।
কাশ্মীৰৰ বাৰামুলাৰ নাম্বালা ছেক্টৰত পাক সেনাই অপ্ৰৰোচিত ভাবে গুলীচালনা কৰাৰ ফলত দুজন ভাৰতীয় সেনা জোৱানৰ মৃত্যু ঘটে।
হাজী পীৰ ছেক্টৰত পাক সেনাৰ আক্ৰমণত মৃত্যু ঘটে বিএছএফৰ এজন বিষয়াৰ।
হাজীপুৰ ছেক্টৰৰ আক্ৰমণৰ ঘটনাত এগৰাকী অসামৰিক মহিলাৰ মৃত্যু ঘটে লগতে এজন সেনা জোৱানো শ্বহীদ হয়।
একেদৰে বাৰামুলা জিলাৰ উৰি ছেক্টৰত দুজন অসামৰিক লোকৰ মৃত্যু ঘটে।কামালকোটা ছেক্টৰত মৃত্যু ঘটে আন এজন অসামৰিক লোকৰ।
ভাৰতীয় সেনাৰ মুখপাত্ৰ ৰাজেশ কালিয়াই প্ৰকাশ কৰা মতে পুৱাৰ ভাগত পাকিস্তানৰ সেনাই গুলী আৰু মৰ্টাৰেৰে আক্ৰমণ চলোৱাৰ পিছতে ভাৰতীয় সেনায়ো গুলীৰে প্ৰত্যুত্তৰ দিয়ে।ফলত পাক সেনাৰ কমেও ১০ জন জোৱান নিহত হোৱা বুলি তেওঁ কয়।
দুয়ো পক্ষৰ মাজত বহু সময় ধৰি সংঘৰ্ষ চলি থাকে। এই ঘটনাত কেইবাজনো ভাৰতীয় সেনাৰ জোৱান আহত হয়।
আহত জোৱান কেইজনক সেনাৰ বেছ হাস্পাতালত ভৰ্তি কৰোৱা হয় যদিও এজন জোৱানৰ মৃত্যু ঘটে।
পাকিস্তানী সেনাই পুৱাৰ ভাগতে উৰিকে ধৰি আন কেইবা ঠাইতো গুলীবৰ্ষণ কৰি থকাত সেই অঞ্চলত বাস কৰা লোকসকলে ঘৰৰ ভিতৰতে সোমাই থাকিবলগীয়া হৈছে।