তামুলপুৰত বিপিএফৰ পৰা প্ৰাৰ্থিত্ব বিচাৰি ছয় প্ৰাৰ্থীৰ আবেদন
সমাগত বিধান সভাৰ নিৰ্বাচনৰ দিন ঘোষণা হোৱা নাই যদিও বিভিন্ন ৰাজনৈতিক দলৰ নেতা কৰ্মীয়ে প্ৰাৰ্থিত্ব বিচাৰি তৎপৰ হৈ পৰিছে।
আজি ৫৮ নং তামুলপুৰ বিধান সভা সমষ্টিৰ পৰা প্ৰাৰ্থীত্ব বিচাৰি বিপিএফৰ জ্যেষ্ঠ নেতা তথা তামুলপুৰ জিলা বিপিএফৰ সভাপতি কেশৱ ৰাজবংশীয়ে বিপিএফ দলৰ পৰা প্ৰাৰ্থিত্ব বিচাৰি তামুলপুৰ জিলা বিপিএফৰ উপ-সভাপতি যতীন চৰকাৰ আৰু সাধাৰণ সম্পাদক উপেন বসুমতাৰীৰ হাতত আবেদন পত্ৰ দাখিল কৰে।
আবেদন পত্ৰ দাখিল কৰাৰ পিছত সাংবাদিকৰ সৈতে হোৱা এক আছুতীয়া সাক্ষাৎকাৰত কেশৱ ৰাজবংশীয়ে কয় – আজি মোৰ বাবে এটা ঐতিহাসিক দিন । মই ৰাজনৈতিক জীৱন আৰম্ভ কৰাৰ দিনৰ পৰাই বিপিএফৰ বিভিন্ন পদবীত অধিষ্ঠিত হৈ আছোঁ আৰু বিগত ন বছৰ ধৰি তামুলপুৰ জিলা বিপিএফৰ সভাপতি পদত কাৰ্যনিৰ্বাহ কৰি আছো। বিপিএফৰ সংকটপূৰ্ণ সময়ত আৰু বেয়া দিন চলা সময়তো মই দলৰ হৈ সবল নেতৃত্বত দি দলৰ হৈ কাম কৰি আহিছো। মই প্ৰাৰ্থিত্ব পালে বিপুল ভোট লাভ কৰি জয় যুক্ত হম বুলি মই নিশ্চিত। ভৌগোলিক ভাৱে বিভিন্ন জাতি জনগোষ্ঠীৰে পূৰ্ণ বৃহত্তৰ ৫৮ নং তামুলপুৰ বিধানসভা সমষ্টিত যথেষ্ট সমস্যা আছে আৰু এই সমস্যা সমূহ সমাধান কৰাৰ ক্ষেত্ৰত মই গুৰুত্বপূৰ্ণ ভুমিকা লোৱাৰ বাবে মনত আশা পুহি ৰাখিছো। বিপিএফৰ কেন্দ্ৰীয় সমিতিয়ে মোক এইবেলি প্ৰাৰ্থিত্ব প্ৰদান কৰি মোক বিধানসভালৈ যোৱাৰ ক্ষেত্ৰত সুবিধা কৰি দিব বুলি মই আশাবাদী। যিহেতু মই তামুলপুৰ জিলা বিপিএফৰ মুখ্যপদ সভাপতি পদত অধিষ্ঠিত হৈ আছো আৰু দলীয় নেতৃত্বৰ পৰাও মই সহাৰি পাইছোঁ, সেয়েহে তামুলপুৰ সমষ্টিত বিপিএফৰ পৰা মই দলীয় প্ৰাৰ্থিত্ব পাম বুলি এশ শতাংশই নিশ্চিত।’
ইপিনে তামুলপুৰ জিলা বিপিএফৰ সাধাৰণ সম্পাদক উপেন বসুমতাৰীয়ে সংবাদ মাধ্যমৰ আগত জানিব দিয়ে যে আজি তামুলপুৰ জিলা বিপিএফৰ সভাপতি কেশৱ ৰাজবংশীয়ে বিপিএফ দলৰ পৰা প্ৰাৰ্থিত্ব বিচাৰি আবেদন কৰাৰ উপৰি আৰু পাঁচ গৰাকীয়ে দলীয় প্ৰাৰ্থিত্ব বিচাৰি আবেদন দাখিল কৰিছে।
বিপিএফ দলৰ পৰা প্ৰাৰ্থিত্ব বিচৰা আন পাঁচ গৰাকী নেতা ক্ৰমে তামুলপুৰ জিলা বিপিএফৰ কাৰ্যকৰী সভাপতি আদিত্য সিংহ, তামুলপুৰৰ প্ৰাক্তন বিধায়ক চণ্ডী বসুমতাৰী, বিপিএফ নেতা ৰংজা খুঙ্গৰ বসুমতাৰী, প্ৰাক্তন বিধায়ক দেৰহাগ্ৰা মোছাহাৰী আৰু ৰাজেন বড়ো।
এই ছয় গৰাকীৰ আবেদন হাগ্ৰামা মহিলাৰী নেতৃত্বাধীন বিপিএফৰ কেন্দ্ৰীয় সমিতিলৈ প্ৰেৰণ কৰা হব আৰু কাক প্ৰাৰ্থিত্ব দিব সেয়া বিপিএফ দলৰ কেন্দ্ৰীয় নেতৃত্বই চূড়ান্ত সিদ্ধান্ত লব।
দলে যি গৰাকী লোকক প্ৰাৰ্থীত্ব প্ৰদান কৰিব তেওঁক জয় যুক্ত কৰি নিয়াৰ বাবে তামুলপুৰ জিলা বিপিএফ দলে ঐক্যবদ্ধ ভাবে কাম কৰি যাব বুলিও তাৎপৰ্যপূৰ্ণ মন্তব্য কৰে উপেন বসুমতাৰীয়ে।