ক’ৰ’না ভাইৰাছৰ ফলত প্ৰথমজন ভাৰতীয় লোকৰ মৃত্যু

ক’ৰ’না ভাইৰাছে দেশবাসীক চিন্তিত কৰি তোলাৰ সময়তে এই ভাইৰাছ বিধৰ ফলত বৃহস্পতিবাৰে নিশা কৰ্ণাটকত এজন ব্যক্তিৰ মৃত্যু হয়। ক’ৰ’না ভাইৰাছৰ ফলত ভাৰতত মৃত্যু হোৱা এইটো প্ৰথম ঘটনা।

৭৬ বছৰীয়া লোকজনৰ মৃত্যু কৰ্ণাটকৰ কলবুৰ্গীত হৈছে। লোকজন চৌদি আৰবৰ পৰা অহাৰ পিছতে ক’ৰ’না ভাইৰাছত আক্ৰান্ত হোৱা বুলি জানিব পৰা গৈছে।

উল্লেখ্য যে দেশত বৰ্তমান ৭৫ গৰাকী লোক ক’ৰ’না ভাইৰাছত আক্ৰান্ত হৈছে। দিল্লীত ৬, হাৰিয়ানাত ১৪, কেৰলাত ১৭, ৰাজস্থান ৩, তেলেংগনাত ১, উত্তৰ প্ৰদেশ ১১, লডাখ ৩, তামিলনাডুত ১, জম্মু-কাশ্মীৰত ১, পঞ্জাৱত ১, কৰ্ণাটকত ৪ আৰু মহাৰাষ্ট্ৰত ১১।

ক্ৰমাৎ ভয়াবহ ৰূপ ধাৰণ কৰিবলৈ লোৱা ক’ৰ’না ভাইৰাছৰ বাবে ইতিমধ্যে দিল্লী চৰকাৰে অহা ৩১ মাৰ্চলৈ বিদ্যালয়-মহাবিদ্যালয়, চিনেমা হল আদি বন্ধ ৰখাৰ নিৰ্দেশ দিছে।

তদুপৰি উত্তৰাখণ্ড চৰকাৰেও ৩১ মাৰ্চলৈ বন্ধ ঘোষণা কৰিছে সকলো স্কুল।

ক’ৰ’না ভাইৰাছৰ সংক্ৰমণৰ পৰা বচাবলৈ ভাৰত চৰকাৰে অহা ১৫ এপ্ৰিললৈকে বিদেশী পৰ্যটকৰ ভিছা বাতিল কৰাৰ সিদ্ধান্তও লয়।

উল্লেখ্য যে ইৰাণত ৬ হাজাৰ ভাৰতীয় লোক আৱদ্ধ হৈ আছে। ইয়াৰ ভিতৰত আছে জম্মু-কাশ্মীৰ, লাডাখ, মহাৰাষ্ট্ৰ সহিতে বিভিন্ন ৰাজ্যৰ প্ৰায় ১১০০ তীৰ্থযাত্ৰী। তদুপৰি জম্মু-কাশ্মীৰ, কেৰলা সহিতে অন্য ৰাজ্যৰ ৩০০ ছাত্ৰ আৰু হাজাৰৰো অধিক মাছমৰীয়া লোক আৱদ্ধ হৈ আছে।